,,ნაციონალური მოძრაობის" ერთ-ერთი ლიდერისა და ყოფილი დეპუტატის კობა ბექაურის განცხადებით 2005 წელს სწორედ შს ყოფილი მინისტრისა და იუსტიციის ყოფილი მინისტრისგან მიიღო დავალება, რომ ,,202"-ის დამფუძნებლის შალვა რამიშვილისთვისა და გენერალური დირექტორისთვის დავით კოხრეიძისთვის თანხა შეეთავაზებინა. როგორც ,,მაესტროს" ეთერში კობა ბექაურმა განაცხადა სანაცვლოდ ტელეკომპანია ,,202"-ს უარი უნდა ეთქვა დეპუტატის შესახებ სტუდია ,,რეპორტიორის" მიერ მომზადებულ მაკომპრომიტირებელი ფილმის გაშვებაზე.
,,როცა დამიბარეს დათა ახალაიას კაბინეტში იქ იჯდა ვანო მერაბიშვილი, ზურაბ ადეიშვილი და თავად დათა. მაშინ, როცა საუბარი იყი იმაზე, რომ შენთვის ფული შემეთავაზებინა და ამის მერე დაგაკავებდნენ. იქ წინააღმდეგობა გავუწიე და ვუთხარი ჩემგან ფულის გადაცემა არ გამოვიდოდა და მე თანხას არ მივცემდი რაზეც ადეიშვილმა მითხრა დაგიჭერ და გაგანადგურებო", -განაცხადა კობა ბექაურმა.
შეგახსენებთ, რომ ტელეკომპანია "202"-ის დამფუძნებლები შალვა რამიშვილი და დავით კოხრეიძე 2005 წლის აგვისტოში დააპატიმრეს. მათ დეპუტატ კობა ბექაურისგან 100 000 აშშ დოლარის გამოძალვაში დასდეს ბრალი. რამიშვილის და კოხრეიძის დაკავება ფარული ვიდეოკამერით გადაღებული იმ ვიდეო-მასალის საფუძველზე განხორციელდა, რომელიც სამართალდამცველ ორგანოებს თავად ბექაურმა მიაწოდა.
