რუსეთი საქართველოსთან სავაჭრო ურთიერთობებს აძლიერებს. როგორც „საქსტატის" საიტზე განთავსებული სტატისტიკური ინფორმაციიდან ირკვევა, 2011 წლის ათი თვის მონაცემებთან შედარებით, 2012 წლის იანვარ-ოქტომბერში საქართველო-რუსეთის სავაჭრო ურთიერთობები გაიზარდა. „საქსტატის" ინფორმაციით, 2012 წლის იანვარ-ოქტომბერში საქართველომ და რუსეთმა 428 მლნ 366 ათას 500 დოლარის ივაჭრეს და რუსეთი საქართველოსთვის უმსხვილეს საიმპორტო ქვეყნების ჩამონათვალში მეხუთე ადგილზეა.
სტატისტიკური ინფორმაციის მიხედვით ირკვევა, რომ იანვარ-ოქტომბერში რუსეთიდან საქართველოში 391 მლნ 184 ათას 600 დოლარის პროდუქციაა იმპორტირებული, მაშინ როდესაც გასული წლის ანალოგიურ პერიოდში რუსეთიდან საქართველოში 307 მლნ 899 ათას 500 დოლარის პროდუქციის იპორტია განხორციელებული. აღსანიშნავია, რომ იანვარ-ოქტომბრის მონაცემებით, მთლიან იმპორტში რუსეთიდან იმპორტირებული პროდუქციის წილი 6 %-ია.
ხოლო, რაც შეეხება ექსპორტს, 2012 წლის იანვარ-ოქტომბრის მონაცემებით, საქართველოდან რუსეთში ექსპორტირებულია 37 მლნ 181 ათას 900 დოლარის პროდუქცია. ხოლო 2011 წლის იანვარ-ოქტომბრის მონაცემებით, საქართველოდან რუსეთში 31 მლნ 750 ათას 100 დოლარის პროდუქციაა გატანილი. აღსანიშნავია, რომ მთლიან ექსპორტში, საქართველოდან რუსეთში იმპორტირებული პროდუქციის წილი მხოლოდ 1,9 %-ია.
შეგახსენებთ, რომ ახალი მთავრობა აქცენტს რუსეთთან სრულყოფილ სავაჭრო ურთიერთობების აღდგენაზე აკეთებს. საქართველოს რუსვილი აქვს, რომ ქართული ღვინო რუსულ ბაზარზე ისევ დაბრუნდეს. ამ მიზნით, ორ ქვეყანას შორის დიალოგი უკვე დაწყებულია და საბოლოო გადაწყვეტილება უახლოეს ხანებში გახდება ცნობილი.
ქართულ მხარეს ასევე იმედი აქვს, რომ რუსულ ბაზარს ქართულ ღვინოსა და მინერალურ წლებთან ერთად ქართული ციტრუსიც დაუბრუნდება.
