ტურისტული ბიზნესი გაურკვევლობაშია. მათი გაურკვევლობა კი ახალი მთავრობის მდუმარებას უკავშირდება, რომელსაც ქვეყნის ტურისტული განვითარების სამომავლო გეგმებზე და პრიორიტეტებზე ამ დრომდე არ უსაუბრია.
ტურისტული ბიზნესი კი ამბობს, რომ მათთვის ამ დრომდე უცნობია, თუ რა პოზიცია აქვს ტურიზმის განვითარებასთან დაკავშირებით ახალ მთავრობას. ეს გაურკვევლობა კი აზიანებს, როგორც კომპანიის ინტერესებს, ასევე საბოლოო ჯამში ქვეყნის ინტერესებსაც.
ტურისტული კომპანია „გუდაური ჰელისკის" წარმომადგენელი ვახტანგ ასათაში აცხადებს, რომ ტურისტული ბიზნესისთვის უცნობია, თუ რა პრიორიტეტები აქვს ახალ მთავრობას და რა მიმართულებით იმუშავებს ტურიზმის ეროვნული სააგენტო.
„ჯერჯერობით რაც ისმის, არის ის, რომ რაღაც პროექტები უნდა შეჩერდეს, რაღაც პროექტები უნდა გადაიხედოს. აქედან გამომდინარე, ჩვენ ინფორმაცია არ გვაქვს და არ ვიცით, თუ რა მიმართულებით წავა ქართული ტურიზმის განვითარება.
ტურიზმი, როგორც ბიზნესი თვითდინებით ვითარდება, თუ ქვეყანაში კრიმინოლოგიური ვითარება გაუარესდება, ეს თავისთავად ნეგატიურ შედეგებს იქონიებს ტურიზმის ინდუსტრიაზე"- აცხადებს „ბიზნესკურიერთან" საუბრისას, ვახტანგ ასათაშვილი.
ტურისტული ბიზნესი ამბობს, რომ წინამოსამზადებელი სარეკლამო კამპანია, რაც ვთქვათ ზამთრის ტურისტულ სეზონამდე უნდა განხორციელებულიყო, არ განხორციელებულა, რასაც ბიზნესი წინასაარჩევნო კამპანიას უკავშირებს.
„გუდაური ჰელისკის" წარმომადგენელი აცხადებს, რომ გასულ წელს სამიზე ბაზრებზე მარკეტინგული და სარეკლამო კამპანიები წარმოებდა, წელს კი ეს არ მომხდარა.
„აქედან გამომდინარე ის დაკვეთები რაც გვაქვს, ეს არის შედეგი ჩვენი გასულ წლებში გაწეული აქტიობების, და ასევ იმ სარეკლამო და მარკეტინგული კამპანიების, რაც ჩვენ გასულ სეზონზე ვაწარმოეთ. წელს რაიმე ცვლილებებს არ ველით, თუ პირიქით კლება თუ არ იქნება"- განმარტავს ასათაშვილი.
