დღეს ლიბერთი ბანკის გენერალურმა დირექტორმა, ლადო გურგენიძემ და მაგთიკომის გენერალურმა დირექტორმა, დევიდ ლიმ ერთობლივი პრესკონფერენცია გამართეს.
მობილური ბანკინგი (ანუ საბანკო ანგარიშის მართვა მობილური ტელეფონით) საქართველოში უკვე რამოდენიმე ბანკს აქვს დანერგილი. მათ შორის არის ლიბერთი ბანკის Sმარტივი მობილური აპლიკაცია. მაგრამ დღემდე მობილურ ბანკის გამოსაყენებლად აუცილებელი იყო ძვირადღირებულ iPhone, ან Android სმარტფონებზე შესაბამისი აპლიკაციის დაინსტალირება.
ახლა გაჩნდა ალტერნატივა: SmartPay არის ლიბერთი ბანკისა და მაგთიკომის ახალი ინოვაციური პროდუქტი - მობილური ბანკი ყველასთვის. ეს არის ნებისმიერ მობილურ ტელეფონზე ხელმისაწვდომი მოსახერხებელი და უსაფრთხო საბანკო მომსახურება.
ნებისმიერ მომხმარებელს შეუძლია გახსნას Sმარტივი ანგარიში ლიბერთი ბანკში და ანგარიშის გახსნისას მიუთითოს თავისი მობილურის ნომერი (მაგთი, ბალი ან ბანი). ამის შემდეგ, Sმარტივი ანგარიშის მართვა შესაძლებელია მობილური ტელეფონის საშუალებით. კერძოდ, მომხმარებელი შეძლებს: გადაიხადოს კომუნალური გადასახადები, შეავსოს როგორც საკუთარი, ისე სხვა აბონენტის მობილური ტელეფონის ბალანსი, შეამოწმოს Sმარტივი ანგარიშის ბალანსი, გადარიცხოს თანხა სხვა Sმარტივი ანგარიშზე, გადარიცხოს თანხა საკუთარ eMoney ელექტრონულ საფულეზე და პირიქით.
იმ მომხმარებლებს, რომელსაც აქვთ Sმარტივი ანგარიში და მაგთის მობილური ნომერი დღეიდან უკვე შეუძლიათ ამ სერვისით სარგებლობა. არ არის საჭირო რამე აპლიკაციის დაყენება, უბრალოდ აკრიფეთ *555#OK და მიყევით მარტივი მენიუს ბრძანებებს. მაგთის ნებისმიერ მომხმარებელს, ვისაც ჯერ არ აქვს Sმარტივი ანგარიში, შეუძლია თავის ტელეფონზე აკრიფოს *555#OK და მენიუში აირჩიოს "Sმარტივის ნიკის დარეზერვება", შემდეგ შეიყვანოს მისთვის სასურველი ნიკი (ანუ Sმარტივი ანგარიშის სახელი), ანგარიშის გახსნის პროცესის დასრულება შესაძლებელია ვებსაიტიდან www.smartivi.ge ან ლიბერთი ბანკის ნებისმიერ ფილიალში.
დეტალური ინფორმაციის გაგება SmartPay-ის მომსახურების შესახებ შესაძლებელია ვებ გვერდზე www.smartpay.ge ან მაგთიკომის და ლიბერთი ბანკის ნებისმიერ ფილიალში.
