საქართველო შავი ზღვის ეკონომიკური თანამშრომლობის ორგანიზაციის მიერ დაგეგმილ ბიზნეს-ფორუმში მიიღებს მონაწილეობას, რომელიც ბაქოში გაიმართება. როგორც აზერბაიჯანული მედია წერს, შავი ზღვის ეკონომიკური თანამშრომლობის ორგანიზაციის საპარლამენტო სამიტის ფარგლებში ბიზნეს-ფორუმიც გაიმართება, რომელშიც მონაწილეობას შავი ზღვის ეკონომიკური თანამშრომლობის ორგანიზაციის წევრები მიიღებენ. ბიზნეს-ფორუმი 26 ნოემბრისთვისაა ჩანიშნული და წინასწარი ინფორმაციით მას 100-მდე თურქული და 300-მდე აზერბაიჯანული კომპანია დაესწრება.
შეგახსენებთ, რომ შავი ზღვის ეკონომიკური თანამშრომლობის ორგანიზაცია (BSEC ) შეიქმნა 1992 წლის 25 ივნისს თერთმეტი ქვეყნის სახელმწიფოს მეთაურთა მიერ სტამბოლის სამიტის დეკლარაციისა და ბოსფორის შეთანხმების ხელმოწერით. ორგანიზაციის მიზანი მრავალმხრივი პოლიტიკური და ეკონომიკური ინიციატივების მხარდაჭერა და წევრ ქვეყანათა შორის ინტეგრაციისა და ჰარმონიული თანაარსებობის წახალისებაა შავი ზღვის რეგიონში. 1999 წლის 1 მაისს BSEC-ის ქარტიის ძალაში შესვლის დღიდან ორგანიზაციამ საერთაშორისო იურიდიული პირის ძალაუფლება მიიღო და სრულუფლებიან რეგიონალურ ეკონომიკურ ორგანიზაციად გარდაიქმნა. 2004 წლის აპრილში ორგანიზაციაში სერბეთისა და მონტენეგროს შესვლით წევრთა რიცხვი 12 გახდა.
