აჭარის შემოვლითი გზის დაფინანსებისა და მშენებლობის საკითხს პროკურატურა შეისწავლის. პროექტის შესახებ არსებული ინფორმაცია რეგიონული განვითარებისა და ინფრასტრუქტურის სამინისტრომ საქართველოს მთავარ პროკურატურისას გამოსაძიებლად გაუგზავნა.
სამინისტროს ინფორმაციით, აჭარის შემოვლითი გზის მშენებლობისთვის საქართველოს რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტის მიერ მიწის შესყიდვის საკითხს (1 კვ/მ 12 ლარად), რომელიც 2008 წლის ივლისში, გაცილებით იაფად იქნა გასხვისებული შპს "მილენიუმ ტრანსზე" (7 თეთრად 1 კვ/მ). ასევე, აჭარის ავტონომიური რესპუბლიკის ეკონომიკისა და ფინანსთა სამინისტროს მიერ 2008 წლის მაისში შპს "მილენიუმ ტრანსისთვის" გადაცემულ და 2011 წლის სექტემბერში (1 239 790 ლარად) გამოსყიდული მიწის საკითხს.
მინისტრის მოადგილე, ტენგიზ შერგელაშვილი განმარტავს, რომ აზიის განვითარების ბანკის მიერ "საგზო დერეფნის საინვესტიციო პროგრამის" დაფინანსების შესახებ საუბარი ჯერ კიდევ 2007 წლის 19 ნოემბერს დაიწყო. შესაბამისად, 2008 წლის მაისისთვის უკვე ცნობილი იყო, რომ ზემოთ აღნიშნული მიწის ნაკვეთი აჭარის შემოვლითი გზის მშენებლობისთვის დასჭირდებოდა სახელმწიფოს.
შპს "მილენიუმ ტრანსის" მფლობელი იმ პერიოდისთვის (2008 წ) იყო მოქალაქე თამაზ ნიჟარაძე. თუმცა შემდეგ მოხდა წილების გადანაწილება და ამჟამად მისი მეწილეები არიან საქართველოს პარლამენტის ყოფილი ვიცე-სპიკერი ჯემალ ინაიშვილი, ყოფილ ხელისუფლებასთან დაახლოებული პირი თამაზ ნიჟარაძე და თემურ ჯაში.
"საქართველოს რეგიონული განვითარებისა და ინფრასტრუქტურის სამინისტრო მიიჩნევს, რომ არსებული ფაქტები გამოძიების საფუძველს იძლევა. გარდა ამისა, ანალოგიურად არის განხორციელებული სახელმწიფო საკუთარებაში არსებული მიწების პრივატიზება და შემდგომ მისი გაზრდილი ფასებით გამოსყიდვა სხვა ავტომაგისტრალების მშენებლობის განსახორციელებლადაც", - აცხადებს შერგელაშვილი.
