საარჩევნო სისტემების საერთაშორისო ფონდის (IFES) ინიციატივით გენდერულ საკითხებზე მომუშავე ჟურნალისტების ქსელი იქმნება. ქსელის მიზანია ქვეყანაში გენდერული პოლიტიკის გატარების ხელშეწყობა, მედიის გააქტიურება და გენდერული თანასწორობის საკითხების პოპულარიზაცია.
ქსელის შექმნის ინიციატივით შაბათს, ჟურნალისტებისა და არასამთავრობო ორგანიზაციებისათვის გამართულ ტრენინგზე საარჩევნო სისტემების საერთაშორისო ფონდი (IFES) გამოვიდა. IFES-ის გენდერისა და ინფორმირების პროგრამის მენეჯერმა ლადო მკერვალიშვილმა ისაუბრა მედიის როლზე გენდერული საკითხების გაშუქებასა და პოპულარიზაციაში და მოუწოდა არასამთავრობო ორგანიზაციებსა და მედიას მჭიდრო თანამშრომლობისაკენ, ქვეყანაში გენდერული პოლიტიკის განხორციელებაში აქტიური ჩართულობისაკენ.
ტრენინგს ესწრებოდა გენდერული თანასწორობის ქსელის ხელმძღვანელი მანანა მებუკე, რომელმაც გამოთქვა მზადყოფნა მჭიდროდ ითანამშრომლოს გენდერულ საკითხებზე მომუშავე ჟურნალისტთა ქსელთან. მანანა მებუკის განცხადებით, გენდერული თანასწორობის ქსელი, რომელიც IFES-ის მხარდაჭერით შექმნა აერთიანებს ათეულობით ორგანიზაციას და ფუნქციონირებს მთელი საქართველოს მასშტაბით. გენდერული თანასწორობის ქსელი და გენდერულ საკითხებზე მომუშავე ჟურნალისტთა ქსელი კი იქნება 2 უმნიშვნელოვანესი მექანიზმი და ბერკეტი პოლიტიკურ პროცესებში გენდერული თანასწორობის მიღწევის, გენდერული პოლიტიკის გატარების და პოპულარიზაციის საქმეში.
ტრენინგზე დამსწრე ჟურნალისტებმა გამოთქვეს სურვილი აქტიურად ჩაერთონ ქსელის მუშაობაში, თუმცა ამავე დროს განაცხადეს, რომ გენდერული პრობლემატიკის შესახებ არ აქვთ საკმარისი ცოდნა და ხედვა და სჭირდებათ გარკვეული მუშაობა ამ კუთხით. ტრენინგს ასევე ესწრებოდნენ მედია სკოლის სტუდენტები, რომლებიც აქტიურად ჩაერთვებიან როგორც ჟურნალისტების. ასევე არასამთავრობო ორგანიზაციების მიერ დაარსებული ქსელის მუშაობაში.
ტრენინგი „ქალი და პოლიტიკა" შაბათს, სასტუმრო ქორთიარდ მერიოტში გაიმართა. ტრენინგი მიზნად ისახავდა მონაწილეთა ცნობიერების ამაღლებას გენდერულ საკითხებზე, ჟურნალისტებსა და არასამთავრობო ორგანიზაციებს შორის თანამშრომლობის და ურთიერთობების განმტკიცებას, ერთობლივი ინიციატივების, ღონისძიებების დაგეგმვის შესაძლებლობის გაზრდას და ხელშეწყობას. ტრენინგზე განხილული იყო გენდერული თანასწორობის და ქალის პოლიტიკურად გაძლიერების მექანიზმები და საშუალებები.
ტრენინგი გაიმართა საარჩევნო სისტემების საერთაშორისო ფონდის (IFES) პროექტის „ნდობის გაზრდა საარჩევნო პროცესებისადმი" ფარგლებში, რომელიც ხორციელდება „ამერიკის შერთებული შტატების საერთაშორისო განვითარების სააგენტო"-ს (USAID) მხარდაჭერით.
