ნიგერიის დროშის ქვეშ მცურავ ტანკერ "მარია დელ კარმენის" 12 ქართველი მეზღვაური სამი თვეა პანამის არხში, პორტ ბალბო ასტანის ნავსადგურიდან 5 კილომეტრის დაშორებით, ზღავში რეიდზე იმყოფება. ქართველი მეზღვაურები საქართველოს მთავრობას დახმარებას სთხოვენ.
მათი განცხადებით, საკვებისა და მედიკამენტების გარეშე არიან დარჩენილები და საწვავის უქონლობის გამო გემზე უკვე ელექტროენერგია გამოირთო, არ მუშაობს გენერატორები და შესაძლოა, მალე მეზღვაურებმა გარესამყაროსთან სატელეფონო კავშირის დამყარებაც ვეღარ შეძლონ.
შეგახსენებთ, რომ ქართველი მეზღვაურები ამ მდგომარეობაში მას შემდეგ აღმოჩნდნენ, რაც ნიგერიელმა მეპატრონემ, ძველი, დაზიანებული გემი მიატოვა და მის გარემონტებაზე უარი თქვა. გემთმფლობელს მეზღვაურებთან კავშირი გაწყვეტილი აქვს და მათთვის რამდენიმე თვის ხელფასიც არ გადაუხდია, რის გამოც, მეზღვაურები სახლში დაბრუნებას ვერ ახერხებენ.
