პრაღის ნატოს საპარლამენტო რეზოლუციაში საქართველოსთან მიმართებაში გაკეთებული ჩანაწერი იყო ევროპასთან ინტეგრაციის კომიტეტის თავმდომარის, ვიქტორ დოლიძისა და თავდაცვისა და უშიშროების კომიტეტის თავმჯდომარის, ირაკლი სესიაშვილის ერთობლივი ბრიფინგის მთავარი თემა.
"რეზოლუციაში საქართველოსთან დაკავშირებით კარგი ჩანაწერი გაკეთდა, რომელიც ნატოს დელეგაციების მხრიდან მომავალ სამიტზე საქართველოსთვის გაწევრიანების სამოქმედო გეგმის მინიჭებას ითვალისწინებს",-განაცხადა ევროპასთან ინტეგრაციის კომიტეტის თავმდომარემ, ვიქტორ დოლიძემ. მისი თქმით, დეკემბერში ნატოს მინისტერიალი გაიმართება, რომელიც ასევე მნიშვნელოვანია.
"ჩვენ ყველა ნაბიჯი უნდა გადავდგათ იმისკენ, რომ მაქსიმალური შედეგი მივიღოთ. იმ შემთხვევაში, თუ კი ჩვენ ე.წ. საშინაო დავალებას კარგად შევასრულებთ და უცხოელი პარტნიორების დარწმუნებას მოვახერხებთ, საქართველოს მაპის მიღების უფრო მეტი პერსპექტივა გაუჩნდება",-აღნიშნა ვიქტორ დოლიძემ.
ნატოს გენერალური მდივანის ანდერს ფოგ რასმუსენის მოხსენებაში, საქართველოში მიმდინარე შიდა პოლიტიკურ ვითარებასთან დაკავშირებით გამოთქმულ შენიშვნებს ვიქტორ დოლიძემ სამწუხარო ფაქტი უწოდა.
მისივე განცხადებით რეზოლუციაში, სადაც საქართველოსთან მიმართებაში მაპია დაფიქსირებული, აღნიშნულია რამდენიმე პრობლემაც.
"პირველი ეს იყო საზოგადოებრივ მაუწყებელზე ზეწოლა, მეორე ე.წ. პოლიტიკური დაპატიმრებები და ადგილობრივი თვითმმართველობის ორგანოებზე ზეწოლა, რომელიც აბსურდის ტოლფასია",-აღნიშნა ვიქტორ დოლიძემ. მისი თქმით, ამ შემთხვევაში პრობლემა იმაში მდგომარეობს, რომ ,,ნაციონალური მოძრაობის" წევრმა, გიორგი კანდელაკმა, რომელიც ჯერჯერობით დელეგაციის ხელმძღვანელია და აქვს კომუნიკაციები ასამბლეის წევრებთან, ყველაფერი გააკეთა იმისთვის, რომ ამგვარი ფორმულირება მოხვედრილიყო რეზოლუციაში. ,,ეს არის არასახელმწიფოებრივი, არაკომპეტენტური და არასწორი მიდგომა. კომიტეტში ეს საკითხი ჩავარდა, რადგან ჩვენ შევიტყვეთ ამის თაობაზე. სასესიო სხდომაზე, მაშინ როდესაც ჩვენ დავტოვეთ სესია, რათა თბილისში საპარლამეტო სხდომაზე ჩამოვსულიყავით, მან მოახერხა, რომ ეს ანტისახელმწიფოებრივი ჩანაწერი მოხვედრილიყო დოკუმენტში",-განაცხადა ვიქტორ დოლიძემ. მისი თქმით, ვინაიდან ევროპულ და ევროატლანტიკურ მისწრაფებებთან დაკავშირებით არანაირი განსხვავებები უმრავლესობისა და უმცირესობის პოზიციას შორის არ არსებობს, საკითხს სახელმწიფოებრივად უნდა მიუდგეს ყველა და პარტნიორ ქვეყნებს დადებითი სიგნალები უნდა გაუგზავნოს. ,,ზეწოლის, ტერორის და ძალადობის ეპოქა დასრულდა, მიუხედავად იმისა, რომ სააკაშვილი ჯერჯერობით პრეზიდენტია. ეს ეპოქა საქართველოში დასრულდა და ჩვენ საერთაშორისო თანამეგობრობის წევრებთნ ალბათ გაათმაგებული ძალისხმევით უნდა ვითანამშრომლოთ იმისთვის, რომ რეალური სურათი დავანახოთ",-აღნიშნა ევროპასთან ინტეგრაციის კომიტეტის თავმჯდომარემ.
პრაღაში დელეგაციის ვიზიტის ცალკეულ დეტალებზე ისაუბრა თავდაცვისა და უშიშროების კომიტეტის თავმჯდომარემ, ირაკლი სესიაშვილმა. მისი თქმით, როდესაც კომიტეტის სხდომაზე საქართველოს საკითხი დაისვა, ამას მოჰყვა მისი და ვიქტორ სანიკიძის ობიექტური რეაქცია. მისივე თქმით, კომიტეტის რამდენიმე დეპუტატმა ასევე გამოთქვა შენიშვნა, რომ არ უნდა მომხდარიყო ასეთი ჩანაწერის გაკეთება, რადგან ანაგარიში საქართველოს შესახებ დაგეგმილია მომავალ წელს და თავისთავად არასწორი იქნებოდა დეტალებზე საუბარი.
"ამიტომ კომიტეტი შემოვიდა რეკომენდაციით, რომ დარჩეს მხოლოდ ის დათქმა, რაც უკავშირდება, იმას, რომ ნატომ გაითვალისწინოს საქართველოსთვის მომავალში მაპის მინიჭების საკითხი, რამდენადაც ამ ქვეყანაში ჩატარდა დემოკრატიული არჩევნები და არის ყველა იმის ნიშანი, რომ შეიძლება გადავიდეთ ახალ საფეხურზე",-განაცხადა ირაკლი სესიაშვილმა.
თავდაცვისა და უშიშროების კომიტეტის თავმჯდომარის, ირაკლი სესიაშვილის განცხადებით, უმრავლესობა აპირებს შეხვდეს ყველა დელეგაციას, საჭიროების შემთხვევაში ჩავიდეს შესაბამის ქვეყნებში, რათა უცხოელ პარტნიორებს მიეწოდოთ არა მარტო ობიექტური ინფორმაცია და არამედ მოხდეს სიტუაციის ახსნა, თუ რატომ შეიძლება დაისვას წინა ხელისუფლების მინისტრების თუ პოლიტიკური ლიდერების პოლიტიკური პასუხისმგებლობის საკითხი.
"ჩვენ ასევე მზად ვართ მოვიწვიოთ ჩვენი პარტნიორები და შევთავაზოთ შეხვედრები დამოუკიდებელ ექსპერტებთან, არასამთავრობო ორგანიზაციებთან, მედიასაშუალებებთან. საკითხის გარკვევის შემთხვევაში ისინი უფრო მეტად დარწმუნდებიან, რომ ის ნაბიჯები, რაც გადადგა ახალმა ხელისუფლებამ, არის სწორედ დემოკრატიისკენ გადაგმული ნაბიჯები და არა პოლიტიკური ნიშნით იმ ძველ დროში დაბრუნება, რასაც თავის დროზე აღუდგა ჩვენი საზოგადოება",-აღნიშნა ირაკლი სესიაშვილმა. მისივე თქმით, საკომიტეტო სხდომის შემდეგ ის და ვიქტორ დოლიძე დელეგაციის ხელმძღვანელთან, გიორგი კანდელაკთან კოორდინირებულ მუშაობაზე შეთანხმდნენ, თუმცა გიორგი კანდელაკმა პირობა დაარღვია.
"საკმარისი იყო ჩვენ დარბაზი დაგვეტოვებინა, რომ, როგორც ჩანს, ჩაირთო ძველი პიარელემენტები, რასაც ყოფილი ხელისუფლება იყენებდა თავის დროზე. საბოლოო ჯამში ქვეყანა დაზიანდა. ამიტომ ვინარჩუნებთ კონსტრუქციულ მიდგომას და მომავალში მოვუწოდებთ ვიყოთ კოორდინირებულები, გვქონდეს განცდა, რომ გვაქვს ჯერ სახელმწიფო და მერე ვიწრო პოლიტიკური ინტერესები, განსაკუთრებით მაშინ, როდესაც საქმე გვაქვს საქართველოს ნატოში ინტეგრაციასთან,"-განაცხადა თავდაცვისა და უშიშროების კომიტეტის თავმჯდომარემ ირაკლი სესიაშვილმა.
