შერჩევითი სამართლის სიტუაციები თავიდან უნდა იქნას აცილებული, - განაცხადა ევროკომისიის პრეზიდენტმა ჟოზე მანუელ ბაროზომ ბრიუსელში პრემიერ-მინისტრ ბიძინა ივანიშვილთან შეხვედრის შემდეგ გამართულ ერთობლივ პრესკონფერენციაზე. მისი თქმით, შერჩევითი სამართალი დაასუსტებს კანონის უზენაესობას და ზიანს მიაყენებს საქართველოს იმიჯს საზღვარგარეთ.
"დემოკრატია უმრავლესობის მმართველობაა, მაგრამ ამავე დროს აუცილებელია უმცირესობების პატივისცემა. დემოკრატია უფრო მეტია, ვიდრე მხოლოდ არჩევნები", - განაცხადა ბაროზომ.
მან საქართველოს პრემიერ-მინისტრს საქართველოში კონსტრუქციული და პასუხისმგებლობის მქონე პოლიტიკური პროცესის გაგრძელებისკენ მოუწოდა.
"ამ თვალსაზრისით, შერჩევითი სამართლის სიტუაციები თავიდან უნდა იქნას აცილებული, ვინაიდან მათ შეიძლება ზიანი მიაყენოს ქვეყნის იმიჯს საზღვარგარეთ და კანონის უზენაესობა შეასუსტოს. მე ეს საკითხი პრემიერ-მინისტრთან დავაყენე და მან ძალიან კონკრეტულად მიპასუხა", - აღნიშნა ბაროზომ.