საქართველოს პრეზიდენტმა მიხეილ სააკაშვილმა აშშ-ის სახელმწიფო დეპარტამენტის საგანგებო დავალებათა ელჩი ქალთა გლობალურ საკითხებში, მელანე ვერვერი, პრეზიდენტის სასახლეში მიიღო. პრეზიდენტმა მას, უპირველესად, ამერიკის შეერთებული შტატების საპრეზიდენტო არჩევნებში ბარაკ ობამას გამარჯვება მიულოცა და შემდგომი წინსვლა უსურვა.
პრეზიდენტის ადმინისტრაციის ინფორმაციით, ქვეყნის პირველმა პირმა იმედი გამოთქვა, რომ ორ ქვეყანას შორის არსებული ტრადიციული ურთიერთობა და თანამშრომლობა პრიორიტეტულ საკითხებში გაგრძელდება. კერძოდ, მხარდაჭერა თავდაცვის სფეროში, ნატოში ინტეგრაციის პროცესში, სავაჭრო ურთიერთობის თვალსაზრისით, დემოკრატიის განვითარების მხრივ და რეფორმების ხელშეწყობის მიმართულებით.
სააკაშვილმა განსაკუთრებული მადლიერება გამოხატა ამერიკის შეერთებული შტატების ადმინისტრაციის მიმართ, რომელიც ცალსახად და მკაფიოდ უჭერს მხარს საქართველოს ტერიტორიულ მთლიანობას.
შეხვედრის მთავარი თემა ასევე გენდერული თანასწორობა და რეგიონში ქალთა როლის წინ წამოწევა იყო. მიხეილ სააკაშვილის განცხადებით, ქალები აქტიურად უნდა იყვნენ ჩართული ქვეყნის განვითარების საქმეში, რაზეც, პრეზიდენტის თქმით, საქართველო ინტენსიურად მუშაობს.
ვერვერის თქმით, ამ მხრივ, ქვეყანამ მნიშვნელოვანი ნაბიჯები გადადგა და პროგრესიც შეინიშნება. როგორც მან აღნიშნა, ორი ქვეყანა ამ მიმართულებით დიდი ხანია თანამშრომლობს და ეს ურთიერთობა კიდევ უფრო აქტიურად უნდა გაგრძელდეს. იგი იმ პრობლემებსაც შეეხო, რომელთა წინაშეც კავკასიის რეგიონის ქალები ამჟამად დგანან და განაცხადა, რომ ქალთა როლის ამაღლების თვალსაზრისით, ამერიკის შეერთებულ შტატებს შეუძლია მნიშვნელოვანი წვლილი შეიტანოს მთელი რეგიონის მასშტაბით.
სახელმწიფო დეპარტამენტის საგანგებო დავალებათა ელჩმა იმ წარმატებებზედაც ისაუბრა, რომლებსაც საქართველომ ქალთა ძალისხმევით მიაღწია. ამ მხრივ, მან ქვეყნის პირველი ლედის სანდრა ელისაბეტ რულოვსის როლი გამოყო.
"არაჩვეულებრივი საუბარი მქონდა თქვენს მეუღლესთან გუშინ და ვერ ვიჯერებ იმას, რაც ჯანდაცვის სფეროში განხორციელდა. მახსოვს, ამ საკითხს 2-3 წლის წინათ განვიხილავდი მასთან და ამ მიმართულებით ნამდვილად უდიდესი პროგრესი შეინიშნება", - განაცხადა მან.
შეგახსენებთ, რომ ვერვერი საქართველოში პირველად ჰილარი კლინტონის ვიზიტის დროს იმყოფებოდა, ამჟამად კი ქვეყანას კავკასიური ტურნეს ფარგლებში ეწვია. საქართველოს გარდა, იგი გენდერული თანასწორობისა და ქალთა როლის ზრდის საკითხებთან დაკავშირებით, აზერბაიჯანში, პოლონეთსა და უკრაინაში გამართავს შეხვედრებს.
