მსოფლიო დაზოგვის დღეს საქართველოში მოქმედი კომერციული ბანკები წელს პირველად აღნიშნავენ. დაზოგვის დღისადმი მიძღვნილი ღონისძიებების კვირეული 31 ოქტობერს, საქართველოს ეროვნულ ბანკში გამართული პრესკონფერენციით დაიწყება და 8 ნოემბერს - ბანკირის დღეს დასრულდება. ღონისძიების ორგანიზატორები არიან ქართული კომერციული ბანკები, შემნახველი ბანკების ფონდი საერთაშორისო თანამშრომლობისთვის, საქართველოს ეროვნული ბანკი, საქართველოს ბანკების ასოციაცია და საქართველოს საბანკო ტრენინგ ცენტრი.
„საქართველოს საბანკო სექტორი ქართული ეკონომიკის ერთ-ერთი ყველაზე სტაბილური და განვითარებული სფეროა. ყოველწლიურად იზრდება დეპოზიტების საერთო მოცულობა და წელს ამ მაჩვენებელმა 15 მილიარდი ლარი შეადგინა. ეს მონაცემი ბანკებისადმი მოქალაქეების მაღალ ნდობაზე მიუთითებს. თუმცა ამ თვალსაზრისით პოტენციალი გაცილებით დიდია, ამიტომ საქართველოს ეროვნული ბანკი მოხარულია ამ პროექტში მონაწილეობით, ჩვენ ყოველთვის მხარს დავუჭერთ და წავახალისებთ საზოგადოების ფინანსური განათლების ღონისძიებებს", - განაცხადა ეროვნული ბანკის აღმასრულებელმა დირექტორმა გიორგი მელაშვილმა.
მსოფლიო დაზოგვის დღეს დიდი ისტორია აქვს და მას 1925 წლიდან ბევრ ქვეყანაში სხვადასხვა ღონისძიებებით აღნიშნავენ. დაახლოებით 90 წელია გერმანული შემნახველი ბანკები (ფინანსურ ინსტიტუტებთან ერთად მსოფლიოს მრავალ ქვეყანაში) აღნიშნავენ და ორგანიზებას უკეთებენ მსოფლიო დაზოგვის დღეს. მსოფლიო დაზოგვის დღე, ან მსოფლიო მომჭირნეობის დღე, როგორც მას ადრე უწოდებდნენ, დაარსდა მსოფლიო შემნახველი ბანკების ინსტიტუტის (WSBI) მიერ და ხალხს აწვდიდა სახლში დაგროვებული ფულის ბანკში შენახვის იდეას. 1925 წლიდან მოყოლებული დაზოგვის დღე ბევრ ქვეყანაში იქცა ყოველწლიურ ტრადიციად და დანაზოგების წახალისების მიზნით სხვადასხვა ღონისძიებებით აღინიშნება.
დანაზოგები მნიშვნელოვანია ქვეყნის ეკონომიკისთვის, ფინანსური ინსტიტუტებისა და მოსახლეობისთვის - დანაზოგები წარმოადგენს ფინანსური ინვესტიციებისთვის ხელმისაწვდომ რესურსს, დანაზოგების გარეშე სტაბილური ეკონომიკური ზრდა არ იქნება. დანაზოგები ბანკებისთვის რეფინანსირების მნიშვნელოვანი წყაროა და ბოლოს, დანაზოგები წარმოქმნიან ინსტრუმენტს, რომელიც ავადმყოფობასთან, უმუშევრობასთან და სხვა ეკონომიკურ სირთულეებთან დაკავშირებული რისკებისაგან გვიცავს. უმჯობესია ხალხმა სურვილების ასრულებისას ისარგებლოს დანაზოგით, ვიდრე აუცილებლობისთვის გამოტანილი სესხების გამო ზედმეტი ვალების რისკის წინაშე დადგეს.
დანაზოგების საშუალებით დღევანდელი დღის საჭიროებების დაკმაყოფილება მომავალი თაობებისთვის სოციალური და ეკონომიკური გარემოს დაუზინებლად ხდება. მსოფლიო დაზოგვის დღის ჩატარება სხვადასხვა ფინანსური ორგანიზაციების, ეროვნული ბანკის, აკადემიებისა და ასოციაციების მონაწილეობით ფინანსური სექტორისადმი მოსახლეობის ნდობის აღდგენას შეუწყობს ხელს.
მსოფლიოს დაზოგვის დღეს, როგორც წესი, ფინანსური ინსტიტუტების აქტივობები ძირითადად მიმართულია ბავშვებზე, მოზარდებსა და მშობლებზე; ისინი სთავაზობენ მათ სხვადასხვა პროდუქტს, უხსნიან თუ როგორ მოექცნენ ფულს და ატარებენ საინტერესო ღონისძიებებს. მიზანია არა მხოლოდ დანაზოგების, არამედ პოტენციური..