არსებული მენტალიტეტი - „გამარჯვებული იღებს ყველაფერს", რომელიც დამახასიათებელია მხოლოდ ახალგაზრდა დემოკრატიებისა და გარდამავალი ქვეყნებისთვის, ნელ-ნელა, მაგრამ აუცილებლად გაქრება, - ამის შესახებ საქართველოს პრეზიდენტმა, მიხეილ სააკაშვილმა, ქუთაისში ახალი მოწვევის პარლამენტის პირველ სხდომაზე სიტყვით გამოსვლისას განაცხადა.
" ეს არის დემოკრატია სამუშაო პროცესში. ეს იმ ინსტიტუტების ინკლუზიურობას წარმოადგენს, რომლებიც საქართველოს სახელმწიფომ ააშენა.
ჩვენს ქვეყანაში ხელისუფლების ცვალებადობა ჩვეულებრივ ამბად უნდა იქცეს - ისე, როგორც ეს ევროპულ დემოკრატიულ სახელმწიფოებში ხდება.
ამ შემთხვევაში, არსებული მენტალიტეტი - „გამარჯვებული იღებს ყველაფერს", რომელიც დამახასიათებელია მხოლოდ ახალგაზრდა დემოკრატიებისა და გარდამავალი ქვეყნებისთვის, ნელ-ნელა, მაგრამ აუცილებლად გაქრება.
ამ შემთხვევაში, ნელ-ნელა მაგრამ აუცილებლად გაქრება სიტუაციის დამძაბველი ის სამოქალაქო ომისეული რიტორიკაც, რომელიც ახლადშექმნილ პოლიტიკურ ლანდშაფტებს ახასიათებს.
ამ შემთხვევაში, საქართველო ნელ-ნელა, მაგრამ აუცილებლად გახდება ნორმალური ევროპული დემოკრატია, რომლისთვისაც აუცილებლად გაიღება თავისი ბუნებრივი ადგილსამყოფელის - ევროკავშირის კარი და ჩვენსავე ძალისხმევით, ჩვენი ერი აუცილებლად დაუბრუნდება მის ისტორიულ ოჯახს", - განაცხადა პრეზიდენტმა.
