არც პოლიტიკური თვალსაზრისით არ იყო ეს ინციდენტი მისთვის მაამებელი და მით უმეტეს მისთვის ეს მსხვერპლი ნამდვილად არ არის სულ ერთი, - ასე აფასებს "ჯი-ეიჩ-ენთან" საუბარში პოლიტილოგი რამაზ საყვარელიძე საქართველო-რუსეთის საზღვრის დაღესტნის მონაკვეთზე დივერსიული დაჯგუფების წინააღმდეგ განხორციელებულ დევნის ოპერაციას.
პოლიტოლოგის თქმით, გავრცელებული ინფორმაცია თითქოს სრული არ არის. თითქოს რაღაც ფრაგმენტებია.
"კერძოდ გავრცელდა ინფორმაცია, რომ დაღესტნელთა ჯგუფი გადმოვიდა და ისინი შეტევას არ გეგმავდნენ. დააკავეს ახალგაზრდები ოღონდ სთხოვეს, რომ არ ყოფილიყო რაიმე ინციდენტი და მათ მისცემოდათ საქართველოში კახეთში ყოფნის საშუალება. მაგრამ ქართულმა მხარემ მოითხოვა რომ დაეყარათ იარაღი, რათა ისინი არ დარჩენილიყვნენ შეიარაღებული ფორმირების სახით. ამის მერე დაიწყო კონფლიქტი"- აცხადებს რამაზ საყვარელიძე და აღნიშნავს, რომ ხელისუფლება ბედნიერად აშკარად არ გამოიყურება იმით, რომ ამ ინციდენტში აღმოჩნდა ჩართული.
"არც პოლიტიკური თვალსაზრისით არ იყო ეს ინციდენტი მისთვის მაამებელი და მით უმეტეს მისთვის ეს მსხვერპლი ნამდვილად არ არის სულ ერთი", - განმარტავს საყვარელიძე.
მისივე განმარტებით, თუ კი ხელისუფლება თვალს დახუჭავდა და იარაღასხმულების საქართველოს ტერიტორიაზე ყოფნას დაუშვებდა, ეს, შესაძლოა, კიდევ სხვა მოვლენებში გადაზრდილიყო.
"მერე შეიძლებოდა არაერთი სირთულე აღმოჩენებულიყო თვალის დახუჭვის გამო. გვახსოვს თვალისდახუჭვისმაგვარი პოლიტიკის დროს, შევარდნაძის პერიოდში რა სიმპტომები გამოიწვია ამან რუსეთის მხრიდან. ასე რომ ძნელია თქმა, უარყოფა ყოველთვის ადვილია, მაგრამ ძნელია თქმა რომელი ნაბიჯი და რომელი მიმართულებით წასვლა იქნებოდა ნაკლებად სახიფათო", - განმარტავს "ჯი-ეიჩ-ენთან" საუბარში საყვარელიძე.
