სილამაზის კონკურს "მის სტუდენტური სახე 2012"-ისთვის მზადება მიმდინარეობს. დღეს გაიმართა კონკურსანტების ფოტოსესია, რომელსაც "კიკალა სტუდიომ" უმასპინძლა. ფოტოსესიაში 30 ფინალისტმა მიიღო მონაწილეობა, რომლებიც 28 ივლისს ბათუმში ფინალურ კონკურსზე გამოვლენ.
პროექტში მონაწილე სტუდენტების შერჩევა შიდა კონკურსისა და ფინალური კასტინგის შედეგად მოხდა. უნივერსიტეტთაშორის პროექტში მონაწილეობდა საქართველოს მასშტაბით არსებული 30 უმაღლესი სასწავლებელი, მათ შორის ბათუმი, ქუთაისი, გორი, თელავი, ზუგდიდი.
სპორტისა და ახალგაზრდობის საქმეთა სამინისტროს და ორგანიზაცია "სტუდენტური სახეს" ინიციატივით, სილამაზის კონკურსი "მის სტუდენტური სახე" მეოთხედ ტარდება. წელს "მის სტუდენტური სახე" ქალთა რეპროდუქციულ ჯანმრთელობას ეძღვნება. პროექტი საქართველოს პირველი ლედის, სანდრა ელისაბედ რულოვსის ჯანსაღი ცხოვრების წესის ინიციატივის Don't Worry, Be Healthy!-ს, რეპროდუქციული ჯანმრთელობის ეროვნული საბჭოსა და გაეროს მოსახლეობის ფონდის საქართველოს ოფისის მხარდაჭერით ხორციელდება. კონკურსის ფარგლებში სხვადასხვა სახის სოციალური, კულტურული და შემეცნებითი ღონისძიება იგეგმება.
"სტუდენტური სახე 2012"-ის მთავარი პრიზი ავტომობილია.
