ქრისტიან-დემოკრატიული მოძრაობის" ლიდერები გურჯაანის რაიონის სოფელ ჩუმლაყში იმყოფებოდნენ. გიორგი თარგამაძე და გიორგი ახვლედიანი გლეხებს ატმის მოსავლის აღებაში დაეხმარნენ. მოძრაობის ლიდერის განცხადებით, წინა წლებთან შედარებით მოსავლის ჩაბარების ფასი შემაშფოთებლად დაბალია.
გლეხებს თვითღირებულებაზე ნაკლებ ფასში უწევთ ატმის მოსავლის რეალიზაცია. ნაკვეთებზე დახარჯული თანხის ამოღებასა და მომსახურებისთვის საჭირო კრედიტების გასტუმრების შესაძლებლობაზე კი საუბარი ზედმეტია.
მოძრაობის ლიდერის განცხადებით, ხელისუფლებამ არ გაითვალისწინა "ქრისტიან-დემოკრატების" შეთავაზებები სოფლის მეურნეობის ინფრასტრუქტურის განვითარებასთან დაკავშირებით.
აღსანიშნავია, რომ არცერთი ხილის მიმღები და გადამამუშავებელი პუნქტი არ ფუნქციონირებს.
"ქრისტიან-დემოკრატები" ასევე მოითხოვდნენ სამაცივრო-სასაწყობო ინფრასტრუქტურის მშენებლობასაც, სადაც მოხდებოდა ხილის ჩაბარება, გლეხის გასტუმრება და პროდუქტის სოლიდურ ფასად ბაზარსა და ექსპორტზე გატანა.
"ის რაც ჩვენ ადგილზე ვნახეთ, ძალიან მკაცრი შეფასებების საფუძველს იძლევა მთავრობისა და სოფლის მეურნეობის სამინისტროს მიმართ. სანამ სააკაშვილი ყვარელში თავის ბაღში არ დაიწყებს ატმის მოყვანას, მანამდე არ გაახსენდება რომ კახეთში გლეხებს ამ მიმართულებითაც ჭირდებათ დახმარება. ეს ყველფერი კიდევ ერთხელ ნათლად გამოხატავს უსისტემობას, უპროგრამობას და ქართული სოფლის მიმართ უგულო დამოკიდებულებას" - განაცხადა გიორგი თარგამაძემ.
