საქართველოს ტექნიკურ უნივერსიტეტსა და კორპორაცია "პიონერს" (PIONEER) (აშშ) შორის ხელშეკრულება დაიდო. ხელშეკრულება ითვალისწინებს 30 თვის განმავლობაში საქართველოს ტექნიკური უნივერსიტეტისთვის 140.000 აშშ დოლარის გადახდას. მისი მიზანია ფართო გამოყენებაში მყოფი ზოგიერთი ჰერბიციდის, რომელიც ხშირად ხვდება ადამიანის საკვებ ჯაჭვში, ნარჩენების მოშორება ნიადაგიდან და წყალსატევებიდან, ბიოინჟინრული მიდგომებით.
სტუ იღებს ვალდებულებას, სელექციურად შეარჩიოს ფართოდ გავრცელებული, ტოქსიკური ბუნების მქონე ჰერბიციდების 2,4-D და დიკამბას დამშლელი ფერმენტების პროდუცენტი (წარმომქმნელი) მიკროორგანიზმები, კერძოდ, სოკოები და ბაქტერიები; გამოყოს და დაახასიათოს ამ ჰერბიციდების დამშლელი ფერმენტული სისტემები, რის შედეგადაც დადგინდება ჰერბიციდების ჟანგვითი დეგრადაციის მექანიზმები; მიღებული შედეგების საფუძველზე დაამუშაოს ნიადაგსა და წყალსატვებში 2,4-D და დიკამბას სრული დაშლის (მინერალიზაციის), ეკოლოგიურად სუფთა ბიოტექნოლოგიები.
სამომავლოდ, საქართველოს ტექნიკურ უნივერსიტეტსა და "პიონერს" შორის ერთობლივი კვლევის ფარგლებში, ნავარაუდებია ჰერბიციდების დამშლელი აქტიური ბიოლოგიური ინსტრუმენტების შექმნა გენმოდიფიცირებული მიკროორგანიზმების მიღებით. კერძოდ, ჰერბიციდების დამშლელი ფერმენტების გენების კლონირება სწრაფად მზარდ მიკროორგანიზმებში უფრო ეფექტური ბიოტექნოლოგიების დამუშავების მიზნით.
ამერიკული კორპორაცია, თავის მხრივ, ფართოდ დანერგავს აღნიშნულ ბიოტექნოლოგიას, ხოლო ბიოტექნოლოგიის კომერციით მიღებული მოგება, შეთანხმების მიხედვით, განაწილდება კორპორაციასა და სტუ-ს შორის.
