თბილისის მერიის ინიციატივით, ახალი, ინოვაციური პროექტის განხორციელება დაიწყო. დღეიდან თბილისელებს შესაძლებლობა აქვთ ქალაქის განვითარებაში საკუთარი წვლილი შეიტანონ. ამისათვის საჭიროა ნებისმიერი დაინტერესებული პირი დარეგისტრირდეს ახალ ვებ-გვერდზე: www.chemitbilisi.com, დააფიქსიროს საკუთარი იდეა, მოიპოვოს თბილისელების მხარდაჭერა და სასურველი პროექტი განახორციელოს.
თბილისის მერია მოქალაქეებს ქალაქისთვის სასარგებლო იდეების განხორციელებაში დაეხმარება.
იდეა, რომელსაც ყველაზე მეტი მხარდამჭერი ეყოლება, მერიის დახმარებით უმოკლეს ვადაში რეალობად იქცევა. პროექტი მიზანად ისახავს, მაქსიმალურად მოერგოს თბილისელების ინტერესებს ყველა ის სიკეთე, რომლის განხორციელებაც თვითმმართველობის მიერ ქალაქში არის შესაძლებელი. ახალი ინიციატივა დამატებითი ინსტრუმენტია, რომლის დახმარებით თბილისის მერია უფრო ეფექტურ ნაბიჯებს გადადგამს ისეთი პრობლემების გადაჭრაში, როგორიცაა: დასაქმება, ინფრასტრუქტურა, საზოგადოებრივი ტრანსპორტი, გამწვანება და კეთილმოწყობა. თითოეული მხარდაჭერილი იდეა მერიის შესაბამის სამსახურში დაუყოვნებლივ განიხილება. პროექტში მოქალაქეების ჩართულობა და მათი დაინტერესება, გაზრდის ვებ-გვერდზე ატვირთული იდეების განხორციელების შანსს. ეს არის მოსახლეობისა და ხელისუფლების თანამშრომლობის საუკეთესო მაგალითი, რათა თბილისი უფრო მეტად კომფორტული და მიმზიდველი ქალაქი გახდეს.
