ევროკომისიის ანგარიშში შარშანდელთან შედარებით ახალი არაფერი წერია, ვერც ჩაიწერებოდა, რადგან ბრიუსელს გამოცხადებული აქვს ბოიკოტი საქართველოს მიმართ. ასეთი ანგარიშის შედგენა შეუძლებელია საქართველოს ხელისუფლებასთან თანამშრომლობის, ინფორმაციის მიღებისა და გადამოწმების გარეშე, – ამის შესახებ პარლამენტის თავმჯდომარემ, შალვა პაპუაშვილმა განაცხადა.
მისი თქმით, ანგარიში ფაქტობრივად პოლიტიკური კომუნიკეა, რომელიც ბრიუსელმა კიდევ ერთხელ გამოაქვეყნა და გამოიყენა საქართველოზე თავდასხმისთვის.
„დღეს ევროკავშირის ელჩს აქვს ბრიფინგი, მეც მაინტერესებს, იქამდე აქვს დრო და შეუძლია, მიპასუხოს: დღეს 4 ნოემბერია, ზუსტად 13 თვე გავიდა 2025 წლის 4 ოქტომბრიდან. დღემდე ევროკავშირი და ევროკავშირის ელჩი არ გამიჯვნიან 4 ოქტომბრის ძალადობას, ევროკავშირის ელჩს დღემდე არ დაუგმია ეს ძალადობა. დღემდე ევროკავშირის ელჩი და, დოკუმენტშიც ვნახეთ, ითხოვს მოძალადეების გათავისუფლებას. ადამიანები, რომლებიც ე.წ. მოლოტოვის კოქტეილებით თავს ესხმოდნენ სხვებს და წვავდნენ, დღეს ასეთ ადამიანებს საფრანგეთში უწოდებენ ადამიანებს, რომლებმაც მკვლელობა სცადეს. საქართველოს შემთხვევაში ბატონი ჰერჩინსკი, კომისიის დოკუმენტთან ერთად, ითხოვს ამ ადამიანების გათავისუფლებას. რა არის ეს, თუ არა ძალადობის წახალისება, ძალადობის წაქეზება და მომდევნო ძალადობის გამოწვევა? ნაცვლად იმისა, ქართველ ხალხს მასწავლებლის ტონით ელაპარაკოს, დღეს გვსურს, ელჩმა აგვიხსნას, 2025 წლის 4 ოქტომბერთან დაკავშირებით რა იყო ევროკომისიის პრესსპკერის განცხადება, რომელმაც მხარი დაუჭირა ხელისუფლების დამხობის მიზნით შეკრებას, რამაც გამოიწვია ძალადობა, პრეზიდენტის სასახლეზე თავდასხმა, რაც დღემდე არ დაუგმია ბატონ ჰერჩინსკის. მეორე საკითხი ეხება მათ, ვინც საპროცესო შეთანხმება მოითხოვეს, პრეზიდენტს შეწყალებით მიმართეს, ადამიანებს, რომლებმაც დანაშაული აღიარეს და ახლა ევროკომისია ამ ადამიანებზე ამბობს, რომ იყვნენ თვითნებურად დაკავებული. ესეც არის ძალადობის წახალისება. ამას ამბობენ იმ ადამიანებზე, რომლებიც პირდაპირ ეთერში ძალადობდნენ, ბრიუსელი და ევროკავშირის საელჩო ამ ადამიანებს ხელს აფარებდნენ. პაველ ჰერჩინსკისგან დღეს კონკრეტულად გვაინტერესებს: გმობს თუ არა 2025 წლის 4 ოქტომბერს პრეზიდენტის სასახლეზე თავდასხმას. ამას პასუხს პირდაპირ თუ არა გასცემს, პასუხიც გასაგებია იქნება, რომ ძალადობის მხარდამჭერი და წამხალისებელი იქნებიან თავად ის და ევროკომისია“, – განაცხადა შალვა პაპუაშვილმა.
მისი თქმით, ელჩმა პირდაპირ და მკაფიოდ უნდა თქვას, გმობს თუ არა საქართველოს პრეზიდენტის სასახლეზე თავდასხმას.
„ამიტომ, ნაცვლად იმისა, რომ კიდევ ერთხელ ნატაციები გვიკითხოს ქართველ ხალხს და ჭკუა გვასწავლოს პაველ ჰერჩინსკიმ, როგორც მთავარმმართებელმა, ისაუბროს იმაზე, რატომ უჭერდა მხარს ძალადობას, რატომ აფინანსებდა ევროკავშირი ძალადობას და მოლოტოვის კოქტეილის კამპანიას, რატომ არ გმობს დღემდე ძალადობას, რატომ ერთხელაც არ მოიკითხა საქართველოს პრეზიდენტი და ერთხელაც არ მივიდა ევროკავშირის ელჩი საქართველოს პრეზიდენტთან, რომ ის მაინც ეკითხა, როგორ არის და სასახლეზე თავდასხმის შემდეგ რა ზიანი მიადგა თუნდაც შენობას და სასახლეს. ადამიანი აქ არის სტუმრად, ჩვენი ქვეყნის სტუმარია და იმდენი კულტურა და შეგნება არ აქვს, რომ საქართველოს პრეზიდენტი მოიკითხოს მას შემდეგ, რაც მის მიერ მხარდაჭერილი ადამიანები თავს დაესხნენ პრეზიდენტის სასახლეს, მაშინ, როდესაც ის მანამდე ლამის თვეში რამდენჯერმე ხვდებოდა სალომე ზურაბიშვილს, პრეზიდენტის შტანდარტის მიმთვისებელს და ამითი ქმნიდა ვიზუალურ აღქმას, თითქოს ლეგიტიმური პრეზიდენტი არის სალომე ზურაბიშვილი და არა მიხეილ ყაველაშვილი. ასე რომ, მისი თანამონაწილეობაც არის, რა თქმა უნდა და მისი დაუდევრობა ამ საკითხში, რომ პრეზიდენტის სასახლეზე მოხდა თავდასხმა. ამიტომ დღეს მე პირადად მისი ბრიფინგიდან მაინტერესებს ერთადერთი რამ: გავიდა 13 თვე საქართველოს პრეზიდენტის სასახლეზე თავდასხმიდან. თქვას პირდაპირ და მკაფიოდ: გმობს თუ არა საქართველოს პრეზიდენტის სასახლეზე თავდასხმას და ამის შემდეგ უკვე შეგვიძლია საუბარი იმაზე, რა შეფასებები აქვს ევროკავშირს. სხვა შემთხვევაში, ჩვენ საქმე გვაქვს მოძალადეების მხარდამჭერ ბიუროკრატიასთან, რომელთანაც მანამდე, ვიდრე ამ რიტორიკას არ შეიცვლიან, ძნელია, რამე გვქონდეს სალაპარაკო“, – განაცხადა შალვა პაპუაშვილმა.
