გაზეთ "ვერსიის" დამფუძნებელი და მთავარი რედაქტორი, მაია ფურცელაძე, მიიჩნევს, რომ საერთაშორისო ორგანიზაციის "რეპორტიორები საზღვრებს გარეშე" რეიტინგში, სადაც საქართველო შარშანდელთან შედარებით რამდენიმე პუნქტით დაწინაურდა, პრესის თავისუფლების მაჩვენებელთან დაკავშირებით, არარეალური სურათია ასახული.
ფურცელაძე მიიჩნევს, რომ შესაძლოა უცხო თვალით საქართველოში პრესის თავისუფლებასთან დაკავშირებით ჩანდეს, თითქოს პრობლემები არ არსებობს, თუმცა რეალური მდგომარეობა გაცილებით მძიმეა.
ფურცელაძის განცხადებით, "რეპორტიორები საზღვრებს გარეშე" რეიტინგებთან დაკავშირებით აღსანიშნავია ისიც, რომ ორგანიზაცია ინფორმაციას ხელისუფლების კონტროლირებადი არასამთავრობო ორგანიზაციებიდან იღებს.
"თავისუფალი პრესა საქართველოში მძიმე მდგომარეობაშია. ცვლილებები არის, მაგრამ ეს ცვლილებები არ არის ხელისუფლების მიღწევა. ხელისუფლება ბევრად უფრო მომთმენია და ამასთან, ზეწოლის ობიექტიც აღარ არსებობს. ხელისუფლება მშვიდადაა იმის გამო, რომ გაზეთებს ტირაჟი არ აქვს. პრესა ხელისუფლებამ თავის ნებაზე მიუშვა და ძირითადი აქცენტი ელექტრონულ მედიაზე გადაიტანა. გარეშე თვალისთვის ეს ნამდვილად ასეა, რომ სიტყვის თავისუფლების ხარისხი ამაღლდა, მაგრამ ჟურნალისტებმა კარგად ვიცით, რა ხდება რეალურად და რა დაუძლეველი ბარიერები არსებობს", _ განუცხადა "ჯი-ეიჩ-ენს" ფურცელაძემ.
შეგახსენებთ, რომ საქართველო პრესის თავისუფელბის ინდექსში, რომელიც საერთაშორისო ორგანიზაციამ "რეპორტიორები საზღვრებს გარეშე" გამოაქვეყნა, საქართველო 81-ე ადგილზეა. ორგანიზაციის ანგარიშის მიხედვით, შარშანდელთან შედარებით, როდესაც საქართველო 120-ე ადგილზე იყო, ქვეყნაში პრესის თავისუფლების ხარისხი გაუმჯობესდა.
