საერთაშორისო თანამშრომლობის სულისკვეთებით და ოქტომბრის საპარლამენტო არჩევნებისთვის საზოგადოების ნდობის განმტკიცების მიზნით, NDI-ის დელეგაცია ქართულ მხარეს გარკვეულ რეკომენდაციებს აძლევს.
"არჩევნების სამართლიანად ჩატარების ვალდებულება: ხელი შეუწყონ ყველა მხარის თანაბარ პირობებში ჩაყენებასა და საარჩევნო კანონმდებლობის თანაბარ გამოყენებას.
პატივი სცენ საარჩევნო კანონმდებლობის მიზნებსა და ნორმებს, რათა ყველა პროცედურა იყოს გამჭვირვალე და საარჩევნო პროცესებისადმი ნდობის გაზრდას შეუწყოს ხელი.
საარჩევნო კამპანიისა და პოლიტიკური პარტიების დაფინანსება: უზრუნველყონ კამპანიის დაფინანსების კანონმდებლობის გამჭვირვალე, თანაბარი და კეთილგონიერი გამოყენება. წინასაარჩევნო პერიოდში აღნიშნული საკითხის აქტუალურობისა და მის გარშემო არსებული დისკუსიის გათვალისწინებით, ხელისუფლებამ უნდა გადახედოს და განიხილოს დამატებითი ცვლილებების შეტანის შესაძლებლობა და ამით უპასუხოს სამოქალაქო საზოგადოების წუხილს ნორმების თანაზომიერად აღსრულების თაობაზე. ასევე, ჩვენ რეკომენდაციაა, საარჩევნო კამპანიის პერიოდში მიღებულ გამოცდილებაზე დაყრდნობით, არჩევნების შემდეგ მოხდეს საარჩევნო კამპანიისა და პარტიების დაფინანსების შესახებ კანონმდებლობის მრავალპარტიულ ფორმატში განხილვა.
მედიის ხელმისაწვდომობა: „Must Carry" პრინციპის კანონმდებლობაში დანერგვა პოზიტიური ნაბიჯია, რომელიც მედიის ხელმისაწვდომობას საქართველოს ბევრი მოქალაქისთვის გაზრდის. უნდა იყოს მოხდეს "Must Carry" პრინციპის წინასაარჩევნო კამპანიის პერიოდამდე ამოქმედება. სხვა სარგებელთან ერთად, მოცემული კანონის ადრეული ამოქმედება შესაძლებელს გახდის კანონის განხორციელების დროს წარმოშობილი გაუთვალისწინებელი პრობლემების მოგვარებას. ასევე, უნდა მოხდეს "Must Carry" პრინციპის არჩევნების შედეგების გამოცხადებამდე გაგრძელების შესაძლებლობის განხილვა.
საარჩევნო კანონმდებლობის აღსრულებით ანგარიშვალდებულების გაზრდა: საზოგადოების ნდობა საარჩევნო პროცესისადმი დამოკიდებულია პროცესში ჩართულობაზე, გამჭვირვალობაზე, ანგარიშვალდებულებასა და სამართლიანობაზე. კანონის აღმასრულებლებმა, პროკურორებმა და სასამართლოებმა, ისევე, როგორც ცენტრალურმა საარჩევნო კომისიამ, ზედმიწევნით უნდა შეასრულონ საკუთარი მოვალეობა და პასუხი აგებინონ საარჩევნო კანონმდებლობის, ამომრჩევლისა და კანდიდატების უფლებების დამრღვევ პირებს. არჩევნებში მონაწილეებმა პატივი უნდა სცენ კანონს და სადავო საკითხები სასამართლოში გაასაჩივრონ"- ნათქვამია ეროვნულ-დემოკრატიული ინსტიტუტის წინასაარჩევნო დელეგაციის ანგარიშში.
