დღეს, 29 ივნისს, სასტუმრო შერატონ მეტეხი პალასში, ჩეხეთის რესპუბლიკის კარიტასს ადგილობრივ პარტნიორებთან ერთად: საქველმოქმედო ფონდი „საქართველოს კარიტასი", კოალიცია დამოუკიდებელი ცხოვრებისათვის, საქართველოს სოციალურ მუშაკთა ასოციაცია და საქართველოს დამსაქმებელთა ასოციაციას პატივი პროექტის „შეზღუდული შესაძლებლობების მქონე ადამიანები: საზოგადოების განუყოფელი და პატივსაცემი ჯგუფი" პრეზენტაცია გამართა.
,,პროექტი სამწლიანია და მგონია პროცესებს სტაბილურად გავყვებით და საბოლოო დასკვნა 2-3 წლის შემდეგ რეკომენდაციის სახით გამოქვეყნდება იმისთვის თუ რა ცვლილებების განხორციელებაა აუცილებელი შეზღუდული შესაძლებლობების მქონე პირების დასაქმებისა და საზოგადოებაში ინტეგრაციისთვის", _ განაცხადა ,,ჯი-ეიჩ-ეთან" საუბარში კოალიცია ,,დამოუკიდებელი ცხოვრებისათვის" თავმჯდომარემ გიორგი ძნელაძემ, რომელიც პროექტის ერთ-ერთი მხარდამჭერია.
ღონისძიება განსაკუთრებულ მნიშვნელობას იძენს იმის გამო, რომ პროექტი „შეზღუდული შესაძლებლობების მქონე ადამიანები: საზოგადოების განუყოფელი და პატივსაცემი ჯგუფი" მიზნად ისახავს გააუმჯობესოს შეზღუდული შესაძლებლობის მქონე პირთა არსებული მდგომარეობა, მათი სოციალური გარიყულობა და მუშაობის პროცესში მათი აქტიური ჩართვის გზით წვლილი შეიტანოს მათი სოციალური ინტეგრაციის პროცესში. პროექტი დაფინანსებულია ჩეხეთის განვითარების სააგენტოს მიერ.
ჩეხეთის რესპუბლიკის კარიტასი აქტიურად მოღვაწეობს საქართველოში 2000 წლიდან. ორგანიზაცია მუშაობს საქართველოს ყველაზე ღარიბი და დაუცველი სოციალური ჯგუფების საკეთილდღეოდ გადაუდებელი დახმარებისა და განვითარების სფეროში, მიუხედავად მათი ეროვნებისა, აღმსარებლობის თუ სოციალური მდგომარეობისა.
„შეზღუდული შესაძლებლობების მქონე ადამიანები: საზოგადოების განუყოფელი და პატივსაცემი ჯგუფი" პროექტის ამოცანებია:
• ავამაღლოთ ცნობიერება შეზღუდული შესაძლებლობის პირების საჭიროებების შესახებ სამთავრობო სტუქტურებში, ასევე დამსაქმებელთა შორის და ფართო საზოგადოებაში.
• შევიმუშაოთ საკანონმდებლო ცვლილებებისთვის აუცილებელი პირობები, რათა გავაუმჯობესოთ შეზღუდული შესაძლებლობის პირების დასაქმების შესაძლებლობები.
• ხელი შეუწყოთ შეზღუდული შესაძლებლობის პირებისა და დამსაქმებელთა შორის ურთიერთობებს და დამსაქმებელთა მოტივირებას შეზღუდული შესაძლებლობის პირების შემდგომი დასაქმების პროცესებში.
