საქართველოს კვალავაც დგას უსაფრთხოებისა და ტერიტორიული მთლიანობის გამოწვევების წინაშე, - ამის შესახებ ეროვნულ-დემოკრატიული ინსტიტუტის (NDI) წინასაარჩევნო დელეგაციის ანგარიშშია ნათქვამი.
"ვარდების რევოლუციიდან რვა წელზე მეტი და რუსეთ-საქართველოს ომის შემდეგ თითქმის ოთხი წელი გავიდა. მიუხედავად იმისა, რომ საქართველოს ბევრი მოქალაქე ქვეყნის ცალკეული დემოკრატიული და ეკონომიკური მიღწევის მიმართ ოპტიმისტურად არის განწყობილი, ისინი ქვეყნის ევრო-ატლანტიკური ინტეგრაციის გზაზე დამატებით რეფორმებს ელიან. მიუხედავად იმისა, რომ ქვეყანა კვალავაც დგას უსაფრთხოებისა და ტერიტორიული მთლიანობის გამოწვევების წინაშე, დემოკრატიული ინსტიტუტებისა და პრაქტიკის განვითარება დასავლეთთან ინტეგრაციის, გრძელვადიანი ეკონომიკური კეთილდღეობისა და სტაბილურობის მიღწევის საუკეთესო საშუალებაა. მოახლოებული საპარლამენტო არჩევნები ქვეყანაში დემოკრატიული პროცესების გაღრმავების, გაფართოებისა და ინსტიტუციონალიზაციის მნიშვნელოვან შესაძლებლობას წარმოადგენს.
დელეგაცია 2008 წლიდან მომავალი საარჩევნო ციკლისთვის მოსამზადებლად გადადგმულ რიგ წარმატებულ ნაბიჯს მიესალმება. შეიქმნა არჩევნებთან დაკავშირებული ახალი ინსტიტუტები, როგორიცაა ამომრჩეველთა სიების დაზუსტების უზრუნველყოფის კომისია და სახელმწიფო აუდიტის სამსახურის (კონტროლის პალატა) ფინანსური მონიტორინგის დეპარტამენტი. კიდევ უფრო განვითარდა სხვა ინსტიტუტები, მაგალითად, თავისუფალი და სამართლიანი არჩევნების უწყებათაშორისი კომისია"- ნათქვამია ეროვნულ-დემოკრატიული ინსტიტუტის წინასაარჩევნო დელეგაციის ანგარიში.
