29 ივნისს, 15:00 საათზე, აშშ-ის ელჩი საქართველოში ჯონ ბასი და საქართველოს პარლამენტის თავმჯდომარე დავით ბაქრაძე NDI-ის 2011-2012 წლის საპარლამენტო სტაჟირების პროგრამის კურსდამთავრებულთა გამოსაშვებ ღონისძიებას უმასპინძლებენ. ღონისძიება გაიმართება საქართველოს პარლამენტის შოთა რუსთაველის სახელობის დარბაზში.
NDI-ის საპარლამენტო სტაჟირების პროგრამა USAID-ის დაფინანსებით მეექვსე წელია ხორციელდება. ერთწლიანი ინტენსიური სტაჟირების პროგრამის განმავლობაში უნივერსიტეტის კურსდამთავრებულებმა საქართველოს საკანონმდებლო პროცესში პრაქტიკული გამოცდილება შეიძინეს და საპარლამენტო სისტემების შესახებ ცოდნა გაიღრმავეს. სტაჟიორები საკომიტეტო მუშაობაში იღებდნენ მონაწილეობას, დეპუტატებისთვის ამზადებდნენ კვლევებსა და ანგარიშებს მიმდინარე მნიშვნელოვან საკითხებზე და მათ საზოგადოების შეკითხვებზე პასუხების დროულად გაცემაში ეხმარებოდნენ. სტაჟიორები ასევე მუშაობდნენ საპარლამენტო ფრაქციებსა და დეპარტამენტებში და პროფესიული უნარ-ჩვევების განვითარების მიზნით გადიოდნენ ყოველთვიურ ტრენინგებს სხვადასხვა თემაზე: საპარლამენტო პროცესი, საკანონმდებლო და პოლიტიკური კვლევა, საჯარო გამოსვლები, მოლაპარაკებები, დებატები და კომუნიკაცია.
გამოსაშვებ ღონისძიებას პარლამენტის წევრები, პარლამენტის აპარატის თანამშრომლები და სხვა მოწვეული სტუმრები დაესწრებიან.
მასალის გამოყენების პირობები
