საქართველოს პრეზიდენტმა ქართველ მეზღვაურებს მეზღვაურთა საერთაშორისო დღე მიულოცა. მიხეილ სააკაშვილმა მეზღვაურებსა და ბათუმის სახელმწიფო საზღვაო აკადემიის კურსანტებს სიტყვით მიმართა და მათ ქვეყნის განვითარების გეგმებზე ესაუბრა. ქვეყნის პირველმა პირმა ყურადღება მეზღვაურთა პროფესიის მნიშვნელობასა და იმ რისკებზე გაამახვილა, რომელიც ამ პროფესიას თან ახლავს.
საქართველო, როგორც საერთაშორისო საზღვაო ორგანიზაციის წევრი, მეორედ აღნიშნავს
მეზღვაურთა საერთაშორისო დღეს. ამჟამად, ქვეყანაში 18 000 მეზღვაურია, რომლებიც სხვადასხვა საზღვაო კომპანიებში არიან დასაქმებული. წელს ღონისძიებას ბათუმის სახელმწიფო საზღვაო აკადემია მასპინძლობს. საქართველოს პრეზიდენტის ინიციატივით, შეიცვალა მეზღვაურის ფორმების სიმბოლიკა (ამოვარდა საბჭოთა ატრიბუტიკა) და იგი დაექვემდებარა ევროპულ სტანდარტებს.
ქვეყნის პირველმა პირმა საქართველოს საზღვაო დარგის განვითარებისა და ამ სფეროში შეტანილი წვლილისათვის შორეული ნაოსნობის კაპიტნები და ბათუმის სახელმწიფო საზღვაო აკადემიის რექტორი ღირსების ორდენებით დააჯილდოვა.
