კოალიცია "ქართულის ოცნების" წარმომადგენლებმა - თინათინ ხიდაშელმა, არჩილ კბილაშვილმა და ამერიკელმა ადვოკატმა , მეთიუ ორსმანმა საქართველოს მთავრობის წინააღმდეგ გაერო-ს ადამიანის უფლებათა კომისიაში საჩივარი შეიტანეს.
საჩივარი ბიძინა ივანიშვილისთვის მოქალაქეობის უკანონოდ ჩამორთმევისა და მისთვის ნატურალიზაციის გზით მოქალაქეობის მინიჭებაზე უარის თქმას ეხება.
"თავად საჩივარში დეტალურად არის საუბარი იმის შესახებ, რომ მიღებული საკონსტიტუციო ცვლილება ვერ უზრუნველყოფს ბიძინა ივანიშვილის პოლიტიკური უფლებების აღდგენას და თავისი არსით, საქართველოს ხელისუფლების მხრიდან, საერთაშორისო მეთვალყურეებისთვის თვალის ახვევის მიზნით განხორციელებული ფარისევლური ქმედებაა. ცვლილებები ემსახურება მხოლოდ ერთი ადამიანის, მიხეილ სააკაშვილის ინტერესებს და მისი დანაშაულებრივი ქმედების (მოქალაქეობის თვითნებური და უკანონო ჩამორთმევა) დაფარვას. საქართველოს ხელისუფლების დანაშაულებრივ გადაწყვეტილებას საფუძვლად უდევს პოლიტიკური მოტივაცია, რათა ბიძინა ივანიშვილი და კოალიცია "ქართული ოცნება" ჩამოშორდეს მომავალ არჩევნებს", - აცხადებენ კოალიციაში.
"ქართული ოცნება" გაერო-ს ადამიანის უფლებათა კომისიას მოუწოდებს, შეძლებისდაგვარად, სწრაფად მიიღოს გადაწყვეტილება, რომელიც დაადასტურებს, რომ საქართველოს ხელისუფლებამ დაარღვია ადამიანის საერთაშორისოდ გარანტირებული პოლიტიკური უფლებები და საქართველოს ხელისუფლებას ბიძინა ივანიშვილისთვის მოქალაქეობისა და პოლიტიკური უფლებების 2012 წლის ოქტომბრის საპარლამენტო არჩევნებამდე აღდგენა დაავალოს.
