"ქართული ოცნების" ახალგაზრდული ორგანიზაცია მედიის მხარდამჭერ სიგნალების აქციას მართავს. აქციამ სახელწოდებით - "ჩემი უფლებაა, ვიცოდე" სტარტი სააკაძის მოედნიდან აიღო. აქციის ერთ-ერთი მთავარი მოთხოვნა მიკროავტობუსებში რადიო სიხშირეების აღდგენაა. როგორც "ქართული ოცნების" აქტივისტები აცხადებენ, თბილისის მერმა გიგი უგულავამ საზოგადოებრივ ტრანსპორტში რადიოს აკრძალვით უკანონო გადაწყვეტილება მიიღო, რაც სიტყვის თავისუფლების და ინფორმაციის მიღების უფლების პირდაპირი შეზღუდვაა.
"ქართული ოცნების" ახალგაზრდა აქტივისტები საავტომობილო კოლონით თბილისის მთავარ გამზირებს გაივლიან, მივლენ ტელეკომპანიების შენობებთან და კომუნიკაციების მარეგულირებელ კომისიასთან.
აქციის მონაწილეები ხმის გამაძლიერებლებით ქუჩებში მოძრავი ავტომობილების მძღოლებს მოუწოდებენ, სიგნალების აქციას შეუერთდნენ და ამით ქართული მედიის მიმართ სოლიდარობა გამოხატონ.
