თბილისის მერია ისტორიული უბნების აღდგენა-რეაბილიტაციას განაგრძობს. 2011 წელს ძველი თბილისის ერთ-ერთ კოლორიტულ უბანში, ქვემო კალაზე, სამღებროს, ირგვლივისა და საადის ქუჩებზე მდებარე სახლების რეაბილიტაცია დაიწყო.
აღნიშნულ ქუჩებზე ძირეული რეკონსტრუქცია ჩაუტარდა 11 სახლს. კვლევის საფუძველზე ხელოვნებათმცოდნეების მიერ რესტავრაციისთვის მომზადებული არქიტექტურული პროექტების შესაბამისად, შესრულდა ფასადების კაპიტალური რესტავრაცია, თითოეული მათგანი უბნისთვის დამახასიათებელი ავთენტური მასალით - ქართული აგურით მოპირკეთდა. აღდგა ისტორიული განაშენიანების ურბანული სტრუქტურა და მოეწყო საფეხმავლო გასასვლელები. მთლიანად შეიცვალა მიწისქვეშა, როგორც მაგისტრალური, ასევე განშტოების კომუნიკაციები: წყალსადენი, კანალიზაცია, სანიაღვრე-სადრენაჟე ქსელი, გაზგაყვანილობა და ელექტროსისტემები. ქუჩები და გასასვლელები სხვადასხვა სახეობის ბუნებრივი ქვის მასალებით მოპირკეთდა, დამონტაჟდა ახალი გარე-განათების ლამპიონები და ბრები. ქვემო კალაზე სარეაბილიტაციო სამუშაოები მიმდინარე წლის ივლისში დასრულდება და ქალაქის კიდევ ერთი ისტორიული უბანი მიმზიდველი გახდება, როგორც ადგილობრივი მოსახლეობისთვის, ისე ტურისტებისთვის.
თბილისის მერი გიგი უგულავა დღეს ქვემო კალაზე მიმდინარე სამუშაოებს გაეცნო. ადგილობრივ მოსახლეობას შეხვდა და მათ ქალაქში მიმდინარე პროექტებზე გაესაუბრა.
