შინაგან საქმეთა მინისტრ ვანო მერაბიშვილის შეფასებით, საგანგებო სიტუაციების მართვის ცენტრი - 112 სახელმწიფო უწყებების კოორდინირებული მუშაობის ბრწყინვალე მაგალითია. მისივე განმარტებით, რამდენიმე სამსახურის გაერთიანებით შექმნილი ცენტრის ერთ-ერთი მთავარი ფუნქციაა, პრობლემა, რომელიც მომსახურების კუთხით ე.წ. პიკის საათებში იქმნებოდა, დროულად აღმოიფხვრას.
"ეს სამსახური ბრწყინვალე მაგალითია სხვადასხვა უწყების, სხვადასხვა სამინისტროს, სხვადასხვა ორგანოს კოორდინირებული მუშაობის. ამ კოორდინაციის საბოლოო მიზანია, მომსახურების ეფექტურობა გაიზარდოს", - განაცხადა ვანო მერაბიშვილმა აღნიშნულ ცენტრში სტუმრობისას და აღნიშნა, რომ პიკის საათებში ისეთ დაწესებულებებში, როგორიცაა პატრული, სასწრაფო და საგანგებო სიტუაციების სამსახური, გარკვეული შეფერხებები იყო და ახლა ამოცანაა, რომ ეს პრობლემა უახლოეს ორ თვეში აღარ არსებობდეს.
"საბიუჯეტო რესურსები ეფექტურად იქნება გამოყენებული იმისთვის, რომ თითოეულმა მოქალაქემ ნებისმიერი ტიპის დახმარება სწრაფად მიიღოს", - განმარტა ვანო მერაბიშვილმა.
საგანგებო სიტუაციების მართვის ცენტრს წუხელ, ვანო მერაბიშვილთან ერთად, საქართველოს პრეზიდენტი და დედაქალაქის მერი გიგი უგულავა სტუმრობდნენ.
