ქართული მხარე თურქი ინვესტორების დაინტერესებას აგრძელებს და ორ ქვეყანას შორის გადებული "ეკონომიკური ხიდის" კიდევ უფრო გამყარებას ცდილობს. ამ მიზნით, სასტუმრო "ჰოლიდეი ინნში" ქართულ-თურქული ბიზნესფორუმი - "საქართველო თურქეთის ვაჭრობის და ინვესტიციების ხიდი" - გაიმართა, რომელსაც 100-მდე საქართველოსა და თურქეთის საქმიანი წრეების წარმომადგენლები ესწრებოდნენ. ფორუმზე საქართველოს ფინანსთა მინისტრმა თურქ ინვესტორებს საქართველოში ინვეტირებისკენ მოუწოდა და მათ ყველა ის ბენეფიტი გაცნო, რაც მათ საქართველოში ინვესტირებით ელოდებათ.
"თურქეთიდან საკმაოდ წარმომადგენლობითი დელეგაცია ჩამოსული. რომ გადავხედოთ საქართველო-თურქეთის საინვესტიციო-სავაჭრო სფეროს, ეს არის მაგალითი იმისა, თუ რისი მიღწევა შეუძლია ამ ორ ქვეყანას, რომელიც ვითარდება სწრაფად და დინამიურად"- აღნიშნა დიმიტრი გვინდაძემ.
როგორც ბიზნესფორუმის ორგანიზატორები აღნიშნავენ, ღონისძიების მიზანს საქართველოსა და თურქეთის ბიზნესისთვის ერთიანი პლათფორმის შექმნა წარმოადგენს, რაც სხვადასხვა სექტორში მოღვაწე ქართველ და თურქ ბიზნესმენებს საშუალებას მისცემს დაამყარონ ურთიერთმომგებიანი კავშირები და განსაზღვრონ პოტენციური პარტნიორები. აღნიშნული ხიდი ასევე შესაძლებელს გახდის საქართველოსა და თურქეთის ბიზნესმენებისა და საინვესტიციო გარემოზე ინფორმაციის გაცვლას, ნოუ-ჰაუსა და გამოცდილების გაზიარებას.
"დღეს საქართველო-თურქეთის სავაჭრო და საინვესტიციო კონფერენცია გავხსენით. ჩვენს ქვეყნებს შორის კომერციულ ურთიერთობებში კვლავ რჩება დიდი პოტენციალი. თურქეთის ბიზნესმენთა და ინდუსტრიალისტთა კონფედერაციის ეს ფართო წარმომადგენლობითი ვიზიტი კიდევ ერთხელ ადასტურებს ამ ინტერესსა და შესაძლებლობებს. ეს კიდევ უფრო მისასალმებელია ვინაიდან კონფედერაცია ტრადიციულად ფოკუსირებულია პრიორიტეტულ ეკონომიკურ ურთიერთობებზე"- განაცხადა საქართველოს სავაჭრო-სამრეწველო პალატის პრეზიდენტმა კახა ბაინდურაშვილმა.
აღსანიშნავია, რომ თურქი ბიზნესმენები საქართველოში კიდევ რამდენიმეხანს დარჩებიან. როგორც ცნობილია, მათ საკმაოდ წარმომადგენლობითი შეხვედრები ექნებათ ქართული კომპანიებში, სადაც თურქი ბიზნესმენები ქართულ საწარმოებს დაათვალიერებენ და წარმოების ტექნოლოგიებს გაეცნობიან.
თურქეთის ელჩი საქართველოში ლევეტ მურტან ბურჰანი განმარტავს, რომ თურქეთისთვის საქართველო რეგიონში ნომერ პირველი პარტნიორია. ელჩის განმარტებით, თურქული სამშენებლო სექტორი საქართველოში ინვესტირებით განსაკუთრებითაა დაინტერესებული. მისივე თქმით, ამ მიმართულებით თურქულმა სამშემნებლო სექტორში 1 მლრდ დოლარზე მეტის ინვესტირება უკვე მოახდინა.
"საქართველოსა და თურქეთს საკმაოდ მჭიდრო კავშირები გაგვაჩნია. საქართველო რეგიონში ჩვენი მთავარი პარტნიორია. ჩვენს შორის პოლიტიკური ურთიერთობები საკმაოდ მაღალ დონეზეა აყვანილი.საზღვრის პასპორტის გარეშეა შესაძლებელი, რაც ჩვენი ურთიერთობების მაღალ დონეზე მიუთითებს, რაც ტავის მხრივ ეკონომიკურ ურთიერთობებზეც აისახება. ჩვენი მიზანია 2012 წელს თურქეთ-საქართველოს ეკონომიკურმა ურთიერთობებმა ახალ, მაღალ მწვერვალებს მიაღწიოს"- განაცხადა ელჩმა.