საქართველოს პრეზიდენტმა ურეკში სანაპირო ზოლზე ათას 800 მეტრის სიგრძის ბულვარის სამშენებლო-სარეაბილიტაციო სამუშაოები დაათვალიერა. პროექტის მიხედვით, დაგეგმილია ბულვარის ტერიტორიის გამწვანება; სავალი ნაწილი დეკორატიული ფილებით მოპირკეთება; თანამედროვე, ევროპული სტანდარტის შესაბამისი გარე განათებებისა და დასასვენებელი სკამების დამონტაჟება; ასევე, სრულად განახლდება ბულვარის ცენტრალური შესასვლელი.
მიხეილ სააკაშვილი წყალმომარაგების ახალ პროექტსაც გაეცნო, რომლის ფარგლებში მთლიანად იცვლება ურეკის წყალსადენისა და საკანალიზაციო სისტემები. მშენებლობის დასრულების შემდეგ ურეკის მოსახლეობა და დაბაში ჩასული დამსვენებლები გაფილტრულ სასმელ წყალს 24 საათიანი, უწყვეტი გრაფიკით მიიღებენ.
ქვეყნის პირველი პირი ადგილობრივებსაც გაესაუბრა და მათ პრობლემების მოგვარებას დაჰპირდა. პრეზიდენტმა ყურადღება გურიის განვითარების გეგმასა და ახალი საწარმოების შექმნის აუცილებლობაზე გაამახვილა.
მასალის გამოყენების პირობები
