"ქრისტიან-დემოკრატების" ლიდერი გიორგი თარგამაძე პარლამენტში ევროპის დემოკრატიულ სტუდენტთა კავშირის პრეზიდენტს და ბორდის წევრებს შეხვდა.
როგორც თარგამაძემ შეხვედრის შემდეგ ჟურნალისტებთან განაცხადა, ახალგაზრდა "ქრისტიან-დემოკრატები" კიდევ უფრო აქტიურად უნდა იყვნენ ინტეგრირებული ამ საერთაშორისო ორგანიზაციაში.
"ჩვენ გვინდა, რომ საერთაშორისო სტუდენტური ორგანიზაციის გამოცდილება გამოვიყენოთ და ახალგაზრდა ქრისტიან-დემოკრატები კიდევ უფრო აქტიურად იყვნენ ინტეგრირებული ამ საერთაშორისო ორგანიზაციაში. ქართველ და უცხოელ ახალგაზრდებს შორის აზრთა გაზიარების კუთხით რაც უფრო მეტი ტრიბუნა იქნება, მით უფრო წაადგება ეს საქართველოში ახალგაზრდული პოლიტიკის ეფექტურად განხორციელებას", - აღნიშნა თარგამაძემ.
ევროპის დემოკრატიულ სტუდენტთა კავშირის სტუდენტები, დღეს პარლამენტის თავმჯდომარესა და საპარლამენტო უმრავლესობის წევრებსაც შეხვდნენ.
საკანონმდებლო ორგანოში გამართული შეხვედრები ღონისძიების - "ევროპის დემოკრატიულ სტუდენტთა კავშირის პოლიტიკური დღეები, თბილისი 13-17 ივნისი, 2012" ფარგლებში გაიმართა.
