ოფიციალური დამასკო უარყოფს თავის მონაწილეობას ქალაქ ხამაში მომხდარ სასაკლაოში. ხელისუფლების ინფორმაციით, აქ მოკლულია 100 ზე მეტი ადამიანი. ოფიციალური დამასკო აცხადებს, რომ სირიის არმია მაშინ მივიდა ხამას მაცხოვრებელთა დასაცავად, როდესაც მათ თავს ტერორისტული ჯგუფების ბოევიკები დაესხნენ (ასე უწოდებს ასადი ოპოზიციას). ”ფრანს პრესის” ინფორმაციით, ოფიციალური დამასკოს განცხადებით, ბრძოლის დროს ტერორისტებსა და სამხედროებს შორის ექსტრემისტული დაჯგუფების ყველა წევრი, რომელიც ალ-კუბეირს დაესხა თავს განადგურეს. სირიის ხელისუფლება აცხადებს, რომ ხამას სოფლებში მასობრივი მკვლელობა ჩადენილია სირიის ხელისუფლებაზე ზეწოლის მიზნით გაეროს უშიშროების საბჭოს სხდომის წინ, რომელიც სირიის კრიზისს ეძღვნება. შეგახსენებთ, რომ სირიის ოპოზიცია ბაშარ ასადის რეჟიმს ახალი სასაკლაოს მოწყობაში ადანაშაულებს. მათი მტკიცებით სულ მცირე 86 ადამიანი არის მოკლული სამთავრობი ძალების მიერ სირიის პროვინცია ხამაში. ამავდროულად, სირიის სახელმწიფო ტელევიზია იუწყება, რომ სამხედროებმა ადგილობრივი მაცხოვრებლების თხოვნით ”ტერორისტების ბაზაზე” იერიში მიიტანეს. გავრცელებული ინფორმაციით, მსხვერპლს შორის 20 ქალი და 20 ბავშვია. მათ უმრავლეობას დანით არის მოკლული და ყელი აქვთ გამოჭრილი. სირიის ოპოზიციური ნაციონალური საბჭოს პრესმდივნის თქმით, მასობრივი მკვლელობებია მომხდარი ასევე სოფლებში კუ-ბეირსა და მარზაფში. სოფელ კუ-ბეირის მაცხოვრებელი, რომელიც სასაკლაოს გადაურჩა ”ბი-ბი-სის”-თან საუბარში აცხადებს, რომ მკვლელობების ბაშარ ასადის ჯარებმა და მისმა ერთგულმა მოხალისეებმა ჩაიდინეს. მისივე ინფორმაციით მოკლულთა შორის ასევე არის სამი თვის ბავშვი. ადგილობრივი საკოორდინაციო ორგანოები იუწყებიან, რომ კუბაირში 78 ადამიანია დაღუპული, მათ შორის 35 ერთი ოჯახის წევრია.