საპარლამენტო უმრავლესობის წევრი გიგი წერეთელი მიიჩნევს, რომ სეპარატისტულ რეგიონების მოსახლეობისთვის აშშ-ში ჩასვლის გაადვილება, საქართველოს სახელმწიფო სტრატეგიის ნაწილია. ამის შესახებ მან აღნიშნულ საკითხზე ჰილარი კლინტონის განცხადების კომენტირების განაცხადა.
მისი თქმით, ხელისუფლება მოხარული იქნება თუ ოკუპირებულ რეგიონებში მცხოვრები მოქალაქეები ძალიან ბევრ პროცესში იქნებიან ჩართულები, მათ შორის უცხოეთში გამგზავრება შეეძლებათ.
"მნიშვნელოვანია, რომ მათი იზოლაცია, უფლებების შელახვა და დისკრიმინაცია არ მოხდეს. მე ვფიქრობ, ეს განცახდება სწორედ ამ კუთხით იყო გაკეთებული. აშშ მხარს უჭერს ჩვენს სტრატეგიას, რომელიც იმასაც გულისხმობს, რომ ამ ადამიანებს განვითარების საშუალება მიეცეთ. რა თქმა უნდა ეს თავისუფალ გადაადგილებასაც გულისხმობს. თქვენ იცით, რომ სახელმწიფომ ე.წ. ნეიტრალური პასპორტები მოამზადა და მათთვის თავისუფლად გადაადგილების გადაწყვეტილება მიიღო", - აღნიშნა წერეთელმა.
მისვე თქმით, აქ საუბარი არ არის სეპარატისტებზე და ძალიან ცოტა ადამიანი იქნება, ვინც ამ საკითხთან დაკავშირებით, კლინტონის განცხადებას, ოკუპირებული ტერიტორიების არაპირდაპირ აღიარებად აღიქვამს, რადგან ეს ტერმინებისა და პოზიციების სრული აღრევაა.
ბათუმში სასტუმრო "რედისონში" ქართულ-ამერიკული სტრატეგიული ქარტიის ფარგლებში გამართულ პლენალურ სხდომაზე სიტყვით გამოსვლისას აშშ-ის სახელმწიფო მდივანმა ჰილარი კლინტონმა განაცხადა, რომ საქართველოს სეპარატისტულ რეგიონების მოსახლეობას აშშ-ში ჩასვლა გაუადვილდება.
"ამ ნაშუადღევს მე გამოვაცხადებ ეტაპებს, რათა გაუადვილდეს სეპარატისტული რეგიონის მოსახლეობას, ამერიკის შეერთებულ შტატებს ეწვიოს. ჩვენ ამას ვხედვათ, როგორც წინ გადადგმულ ნაბიჯს, რათა მივაღწიოთ საქართველოში არსებულ კონფლიქტების მშვიდობიან და სამართლიან მოგვარებას", - განაცხადა კლინტონმა.
