2011 წელს ინტერნეტის მომხმარებელი აბონენტების რაოდენობამ (მობილური ინტერნეტის ჩათვლით) 1,637,905 შეადგინა, რაც წინა წლის შესაბამის მაჩვენებელზე 541,692 აბონენტით (49%-ით) მეტია.
კომუნიკაციების ეროვნული კომისიის 2011 წლის ანგარიშში აღნიშნულია, რომ 2011 წელს მნიშვნელოვნად განვითარდა ფართოზოლოვანი ქსელები და მომსახურება. თუ 2010 წლის ბოლოს 287,144 (ფიქსირებული და უსადენო - მობილურის გამოკლებით) ფართოზოლოვანი ინტერნეტ აბონენტი ფიქსირდებოდა, 2011 წლის ბოლოს იგივე მაჩვენებელმა 388,168 აბონენტი შეადგინა. ფართოზოლოვანი ქსელის აბონენტების რაოდენობა 35%-ით გაიზარდა, ფართოზოლოვანი ინტერნეტ აბონენტების პენეტრაცია2 კი 23%-დან 31%-მდე გაიზარდა.
რაც შეეხება ვიწროზოლოვან ტექნოლოგიებს, CDMA 1x (შემდგომში CDMA) ინტერნეტ აბონენტების რაოდენობა პრაქტიკულად არ შეცვლილა, Dial-Up მომსახურება კი ფაქტიურად აღარ გამოიყენება.
2011 წელს მნიშვნელოვანად გაიზარდა სადენიანი ფართოზოლოვანი ქსელების ინტერნეტ აბონენტების რაოდენობა: ოპტიკურ-ბოჭკოვანი ქსელის ინტერნეტ აბონენტების რაოდენობა 47%-ით, DSL ტექნოლოგიების აბონენტების რაოდენობა კი 23%-ით. უსადენო ფართოზოლოვანი ტექნოლოგიებიდან (მობილურის გარდა) საქართველოში ძირითადად CDMA EVDO (შემდგომში EVDO), WiMax და WiFi ტექნოლოგიებია დანერგილი. EVDO აბონენტების რაოდენობას წლის ბოლოს 41 ათასი, WiMax და WiFi აბონენტების რაოდენობა კი, შესაბამისად, 7,229 და 4,468 იყო. აღსანიშნავია, რომ სამივე ტექნოლოგიის აბონენტების რაოდენობა 2011 წელს
მნიშვნელოვნად გაიზარდა.