დედაქალაქის მერია 27 მაისს დაგეგმილ აქციასთან დაკავშირებით არასამთავრობო ორგანიზაციების განცხადებას პასუხობს, რომელსაც ”ჯი-ეიჩ-ენი” უცვლელად გთავაზობთ:
"ქალაქ თბილისის მერია ეხმიანება არასამთავრობო ორგანიზაციების მხრიდან 2012 წლის 25 მაისს ქ. თბილისის მერიის მიმართ გაკეთებულ მოწოდებას 2012 წლის 27 მაისის აქციასთან დაკავშირებით და აცხადებს, რომ აღიარებს რა საქართველოს კონსტიტუციითა და საერთაშორისო ნორმებით დაცულ მშვიდობიანი შეკრებისა და მანიფესტაციის უფლებას, თავად არ დაუშვებს ამ გარანტირებული უფლებების დაუსაბუთებელ და არაპროპორციულ შეზღუდვას.
ამის დასტური იყო ზუსტად ქ. თბილისის მერიის მხრიდან აქციის ორგანიზატორების მოთხოვნაზე ოპერატიული რეაგირება და მათთვის უფლებამოსილი წარმომადგენლის გამოყოფა, რომელთანაც ერთად მათ მიეცათ აქციის ჩატარების ორგანიზაციული საკითხების განხილვის საშუალება.
რაც შეეხება მიმართვაში დასმულ პრობლემურ საკითხს, რომელიც შეეხება სცენის განთავსებას გზის სავალ ნაწილზე, ვაცხადებთ, რომ ქ. თბილისის მერიის წარმომადგენელმა აქციის ორგანიზატორებს განუმარტა ,,შეკრებებისა და მანიფესტაციების შესახებ" საქართველოს კანონის მოთხოვნები, რომლებიც მათ შორის სხვათა უფლებების დასაცავად არის გათვალისწინებული და რომელთა დაცვა ორგანიზატორების მოვალეობაა. ამასთან, ვითვალისწინებდით რა ეუთოს დემოკრატიული ინსტიტუტებისა და ადამიანის უფლებათა ოფისის და ვენეციის კომისიის სახელმძღვანელო პრინციპებს, რომლის შესაბამისად კანონით მკაფიოდ დაწესებული შეზღუდვების არსებობის მიუხედავად სახელმწიფო ვალდებულია შესთავაზოს აქციის ორგანიზატორებს გონივრული ალტერნატივა, ჩვენს მიერ მათ მიეთითათ, რომ სცენის მოწყობა შესაძლებელია თავისუფლების მოედანზე არსებულ ტროტუარზე, იმგვარად, რომ არ მომხდარიყო ამ კონსტრუქციით გზის გადაკეტვა. აღნიშნული მოსაზრების დაფიქსირებისას, ჩვენ ვეყრდნობით მხოლოდ იმ პოზიციას, რომ ამ შემთხვევაში შესაძლებელია მიღწეულ იქნეს შეკრების ჩატარების, აზრის გამოხატვისა და გავრცელების საყოველთაოდ აღიარებული უფლებების დაცვა, მათი დაუსაბუთებელი შეზღუდვის თავიდან აცილება და იმავდროულად არსებული კანონების დაცვაც.
ყოველივე ზემოაღნიშნულიდან გამომდინარე, მიუხედავად იმისა, რომ პირისპირ შეხვედრისას აქციის ორგანიზატორების მხრიდან არ მომხდარა ამ საკითხებზე მათი საბოლოო ამგვარი კრიტიკული პოზიციის დაფიქსირება, გააზრებული გვაქვს რა, რომ სახელმწიფოს აკისრია პოზიტიური ვალდებულება, ხელი შეუწყოს და დაიცვას აქციის მიმდინარეობა, ვაცხადებთ თანხმობას ორგანიზატორების მიერ სცენის განთავსება მოხდეს მათ მიერ შემოთავაზებული ფორმით",-ნათქვამია მერიის განცხადებაში.
