"ქართული დასის" ლიდერის, ჯონდი ბაღათურიას შეფასებით, ქალაქ ლაზიკის მშენებლობა "ინტერგალაქტიკური მასშტაბის ზღაპარია".
ამის შესახებ მან ლაზიკის სტატუსთან დაკავშირებით, საყოველთაო-სახალხო განხილვის საორგანიზაციო კომისიის დღევამდელ სხდომაზე, კონცეფცია "ლაზიკა - ახალი შესაძლებლობების ქალაქის" განხილვისას განაცხადა.
ბაღათურიამ ლაზიკას მშენებლობას ასევე უწოდა ფანტაზიები უწოდა და "შერეკილებს" შეადარა. იგი ასევე დაინტერესდა ლაზიკას ავტონომიური რესპუბლიკის უფლებები მიეცემა თუ სხვა სამართლებრივი სტატუსი ექნება.
"რა ზღაპრებს გვასმენინებთ, რაღაც ჭაობში აშენებულ ქალაქში ინვესტიციებს ვინ ჩადებს? რა ისეთი იმპერია ჩვენ ვართ, რომ ავტონომია შევქმნათ? წინასაარჩევნოდ იდეები წამოგეჭრათ და ინტერგალაქტიკური მასშტაბის ზღაპრებს გვიყვებით", - აღნიშნა ბაღათურიამ.
მას საყოველთაო-სახალხო განხილვის საორგანიზაციო კომისიის თავმჯდომარე პავლე კუბლაშვილი გამოეხმაურა. მისი თქმით, ოპონენტებს არც იმის სჯეროდათ, რომ გაკეთდებოდა ახალი სიღნაღი, ახალი მესტია, ბათუმი, ქუთაისი და ა.შ.
"ლაზიკის აშენება კოსმიური ფანტაზიები არ არის, როგორც ეს ბაღათურიას მიაჩნია", - აღნიშნა კუბლაშვილმა.
აღნიშნულ საკონსტიტუციო ცვლილებებთან დაკავშირებით საერთო-სახალხო განხილვები მომავალ კვირას რეგიონებში გაგრძელდება.
