საერთაშორისო საფინანსო კორპორაციამ (IFC) და საქართველოს შემოსავლების სამსახურმა მცირე და საშუალო მეწარმეებისთვის უფრო ეფექტიანი და მაღალკვალიფიციური მომსახურების გაწევის მიზნით შემოსავლების სამსახურის თანამშრომლებს ტრენინგები ჩაუტარა, რაც საწარმოებისთვის საგადასახადო ტვირთის შემცირებას ისახავს მიზნად.
IFC-ის საგადასახადო პროექტმა საქართველოში და შემოსავლების სამსახურმა გასულ ორ კვირაში ბათუმში შემოსავლების სამსახურის სერვის ცენტრების თანამშრომლებსა და დასავლეთ საქართველოში მომუშავე უბნის ინსპექტორებს ტრენინგები ჩაუტარა. ტრენინგებზე სხვა საკითხებთან ერთად უბნის ინსპექტორის უფლებები და მოვალეობები განიხილეს. უბნის ინსპექტორები მეწარმეებს კონსულტაციებს უწევენ, რითაც მათ საკანონმდებლო მოთხოვნების შესრულებაში ეხმარებიან.
IFC-ის რეგიონულმა მენეჯერმა სამხრეთ კავკასიაში თომას ლუბეკმა განაცხადა: `გამარტივებული პროცედურები ხელს უწყობს საწარმოებს დაზოგონ დრო და ფინანსური რესურსები. ჩვენ მხარს ვუჭერთ საქართველოს შემოსავლების სამსახურს თანამშრომლების მომზადებაში, რათა მათ მაღალკვალიფიციური კონსულტაციები და მომსახურება გაუწიონ მეწარმეებს."
IFC -ის საგადასახადო პროექტი საქართველოში ავსტრიისა და ლუქსემბურგის მთავრობების და ნიდერლანდების საგარეო საქმეთა სამინისტროს ფინანსური მხარდაჭერით ხორციელდება.
საქართველო IFC -ის წევრი 1995 წელს გახდა. IFC -ის ინვესტიციებმა საქართველოში თითქმის 605 მილიონი აშშ დოლარი შეადგინა სხვადასხვა სექტორის 40 პროექტში. გარდა ამისა, IFC თავისი საკონსულტაციო პროექტის ფარგლებში მუშაობს საქართველოს საგადასახადო სისტემის რეფორმირების მიმართულებით, რაც მცირე ბიზნესის განვითარებას შეუწყობს ხელს. IFC საკონსულტაციო პროექტების მეშვეობით კომპანიებს სურსათის უვნებლობის სტანდარტების ამაღლებაში ეხმარება და ასევე, მუშაობს ბანკებთან მათი რისკის მართვის პრაქტიკის განმტკიცების მიზნით.