საქართველოს მთავრობის გადაწყვეტილებით, 1-ლი სექტემბრიდან სახელმწიფო დამატებით ნულიდან 18 წლამდე შეზღუდული შესაძლებლობის მქონე პირებს დააზღვევს. ამის შესახებ განცხადება ჯანდაცვის მინისტრმა ზურაბ ჭიაბერაშვილმა გააკეთა. მინისტრის თქმით, დღეისთვის საქართველოში 18 წლამდე ასაკის 8645 შეზღუდული შესაძლებლობის პირია რეგისტრირებული, რომლებიც სახელმწიფოსგან ყოველთვიურად პენსიის სახით 70 ლარს იღებენ.
როგორც ჭიაბერაშვილმა განაცხადა, შეზღუდული შეაძლებლობების მქონე მოზარდების სამედიცინო დაზღვევა დაფარავს: სასწრაფო სამედიცინო დახმარებას, ექიმთან კონსულტაციებს, ლაბორატორიულ და ინსტრუმენტულ გამოკვლევებს, გადაუდებელ მკურნალობას, სამედიცინო დაწესებულებაში მათ შორის რეანიმაციულ მკურნალობას. ასევე დაიფარება გეგმური და გადაუდებელი ქირურუგიული ოპერაციები, ონკოლოგიურ დაავადებათა მკურნალობა და დიაგნოსტიკა. დაზღვევა დაფარავს მედიკამენტების ღირებულებასაც.
როგორც ჭიაბერაშვილმა განაცხადა, ზოგიეთი სამედინო მომსახურება ითვალისწინებს თანაგადასახადს დაზღვეულის მხრიდან.
"შემოდგომიდან 18 წლამდე შეზღუდული შესაძლებლობის მქონე პირებთან ერთად ასევე სახელმწიფოი დაზღვევით ისარგებლებს 600 ათასზე მეტი პენსიონერი. 0-იდან 5 წლის ჩათვლით ასაკის 300 ათასზე მეტი ბავშვი და ასევე 10 ათასამდე სხვადასხვა უმაღლესი სასწავლებლის სტუდენტი.
იმით გათვალსწინებით, რომ სახელმწიფო დაზღვევით უკვე სარგებლობენ სოციალურად დაუცველი ოჯახის წევრები პედაგოგები და სხვა შესაბამისი კატეგორიის მოქალაქეები, ხოლო კერძოდ დაზღვეულთა რაოდენობა 400 ათასს აღწევს. 2012 წლის ბოლოს საქართველოში დაზღვეულთა რაოდენობა საერთო ჯამში 2 მილიონ 200 ათას ადამიანს გადააჭარბებს, რაც იმას ნიშნავს, რომ ქვეყანაში ყოველი მეორე ადამიანი დაზღვეული იქნება", _ განაცხადა ჭიაბერაშვილმა.
ჯანდაცვის მინისტრის თქმით, ახალი საავადმყოფოების მენებლობის პარალელურად დაზღვეულთა რაოდენობის ზრდა ხელს შეუწყობს ქვეყანაში ხარისხიანი სამედიცინო მომსახურების ხელმისაწვდომობას.
