ებრაული ავიაბიზნესი საქართველოში ოპერირებით დაინტერესებულია.. როგორც სააგენტო "ჯი-ეიჩ-ენთან" საუბრისას, ეკონომიკისა და მდგრადი განვითარების მინისტრმა ვერა ქობალიამ განაცხადა, მთავრობა ინტენსიურ მოლაპარაკებებს აწარმოებს ერთ-ერთ ებრაულ ავიაკომპანიასთან, რათა მან სექტემბრიდან ფრენები ქუთაისის საერთაშორისო აეროპორტიდან განახორციელოს. მინისტრის თქმით, აღნიშნული ავიაკომპანია დაინტერესებულია ასევე, თბილისიდან ისრაელის მიმართულებით ფრენების განხორციელებაშიც.
"რაც ეხება ისრაელ-საქართველოს შორის ავიამიმოსვლას, ამ მიმართულებით ფრენებს მხოლოდ ერთი ავიაკომპანია ახორციელებს. ამ ეტაპზე ველაპარაკებით ერთ-ერთ ებრაულ ავიაკომპანიას, რათა ქუთაისის საერთაშორისო აეროპორტიდან იფრინოს და ქუთაისიდან ისრაელის მიმართულებით ჩარტერული რეისები განახორციელოს. მათ გარკვეული ინტერესი აქვთ ასევე თბილისის საერთაშორისო აეროპორტიდან ფრენების განხორციელებაზეც. ისაელიდან ტურისტების რაოდენობა იზრდება. ბოლო პერიოდში ისრაელში ინტენსიურ სარეკლამო აქციებს ვატარებთ, იმავდროულად ისრაელში საქართველოს ტურისტულ პოტენციალს ძალიან პოზიტიური იმიჯი შეექმნა და კომპანიებიც უფრო დაინტერესდნენ"- აღნიშნა ვერა ქობალიამ
მინისტრის თქმით, საქართველოში ისრაელიდან ჩამოსული ტურისტების რაოდენობა მზარდია.
შეგახსენებთ, რომ ამ დროისათვის ბათუმს ისრაელის ტურისტული კომპანიების წარმომადგენლები სტუმრობენ. ისრაელის ტურისტული კომპანია „Eshet Tours "-ის 30 წარმომადგენელი რეგიონს აჭარის ტურიზმისა და კურორტების დეპარტამენტის მიერ წარმოებულ სარეკლამო კამპანიის ფარგლებში ესტუმრა. ჯგუფის წევრი ტურ-ოპერატორები რეგიონის ტურისტული პოტენციალის გაცნობის შემდეგ ბათუმს, როგორც ახალ ტურისტულ მიმართულებას პოპულარიზაციას გაუწევენ. ისრაელთან მსგავსი კამპანია ჯერ კიდევ გასულ წელს დაიწყო და ჩარტერულ ფრენებთან ერთად რეგიონს უამრავი ებრაელი ტურისტი სტუმრობდა. წელს მათი რიცხვი კიდევ უფრო გაიზრდება, რასაც მოწმობს ის ფაქტიც, რომ ივნისის ჩათვლით თელავივი-ბათუმის მიმართულებით ყველა ჩარტერული ფრენის ბილეთი გაყიდულია.
ბათუმის აეროპორტმა დღეს ისრაელიდან სეზონის პირველ ჩარტერულ ფრენას უკვე უმასპინძლა, რომელიც აჭარაში 120 ტურისტი ჩავიდა. რეგულარული ფრენები კვირაში ერთხელ ოქტომბრის თვემდე გაგრძელდება.
