დღეს საქართველოს სტატისტიკის ეროვნულ სამსახურში საქსტატსა და შვედეთის სტატისტიკას შორის 3-წლიანი თანამშრომლობის პროექტის შუალედური შემაჯამებელი შეხვედრა გაიმართა.
შეხვედრას ესწრებოდნენ შვედეთის სტატისტიკის, შვედეთის საერთაშორისო განვითარების სააგენტოს (Sida) და საქსტატის წარმომადგენლები.
შეხვედრაზე შეჯამდა პროექტის მიმდინარეობის გასული 6 თვის პერიოდში გაწეული საქმიანობა და დაისახა მომდევნო 6 თვის სამუშაო გეგმა. როგორც შვედეთის სტატისტიკის წარმომადგენელმა აღნიშნა, პროექტი შვედეთის სტატისტიკის ბიუროს საერთაშორისო თანამშრომლობის ისტორიაში ერთ-ერთი ყველაზე წარმატებულია.
შეგახსენებთ, რომ, საქსტატსა და შვედეთის სტატისტიკას შორის 3-წლიანი თანამშრომლობის პროექტის ფარგლებში შვედეთის სტატისტიკა საქსტატს ტექნიკურ დახმარებას უწევს ინფლაციის, მთლიანი შიდა პროდუქტის, თანამშრომელთა ტრენინგის და სხვა ძირითადი სტატისტიკური კომპონენტების ხარისხის გაუმჯობესების მიმართულებით. პროექტის ბიუჯეტი 4 მილიონი ლარის ეკვივალენტს შეადგენს შვედურ კრონებში და მთლიანად დაფინანსებულია შვედეთის საერთაშორისო განვითარების სააგენტოს მიერ.
