მორიგ საქმიან შეხვედრას მართავს საქართველოს სავაჭრო-სამრეწველო პალატის პრეზიდენტი კახა ბაინდურაშვილი - ამჯერად ომანის სასულთნოში. როგორც სავაჭრო-სამრეწველო პალატის პრეზიდენტმა კახა ბაინდურაშვილმა განაცხადა, მას კარგი შეხვედრები ჰქონდა ქ. მასკატში.
ვიზიტის ფარგლებში 20-21 მაისს კახა ბაინდურაშვილი შეხვდა ომანის სავაჭრო-სამრეწველო პალატის თავმჯდომარეს ხალიდ აბდულა ალ ხონჯის. შეხვედრაზე განიხილეს ორ ქვეყანას შორის სავაჭრო-ეკონომიკური ურთიერთობების დინამიკა და სამომავლო პერსპექტივა. გაიმართა მოლაპარაკებები ინვესტიციების წახალისებისა და ექსპორტის განვითარების სახელმწიფო სააგენტოს პასუხისმგებელ მდივანთან ალი ბინ რაშიდ ალ ბალუშთან, ასევე ვაჭრობისა და მრეწველობის მინისტრის მოადგილესთან აჰმედ ჰასან ალ დიბთან. ომანის საგარეო საქმეთა სამინისტროში საქართველოს სავაჭრო-სამრეწველო პალატის პრეზიდენტი შეხვდა ეკონომიკურ საკითხების დეპარტამენტის უფროსს თალიბ ბინ მირან ალ რაესის.
მოლაპარაკებებისას კახა ბაინდურაშვილმა ომანის სავაჭრო-სამრეწველო პალატის წარმომადგენლები და ბიზნესმენები მოიწვია საქართველოში, ისაუბრა საქართველოს საინვესტიციო შესაძლებლბებზე, გატარებულ ეკონომიკურ რეფორმებზე, ქვეყანაში მიმდინარე ურბანულ, ენერგეტიკულ, ინფრასტრუქტურულ, ტურისტულ პროექტებზე.
როგორც სავაჭრო-სამრეწველო პალატის პრეზიდენტმა განაცხადა, ორ ქვეყანას საერთო ინტერესები აქვთ ეკონომიკური ურთიერთობების განვითარების კუთხით. „პირველი ესაა ვაჭრობა- ომანი სოფლის მეურნეობის პროდუქციის დაახლოებით 90%-ის იმპორტს აწარმოებს, რაც განსაკუთრებით საინტერესოა საქართველოსთვის. ომანი ახორციელებს აგრეთვე მინერალური წყლის იმპორტს. მეორე - ინვესტირება- ომანის საქმიანი წრეების მხრიდან არის კარგი შესაძლებლობები საქართველოს სოფლის მეურნეობის სექტორში ინვესტირებისათვის. საერთო ინტერესის კიდევ ერთი სფერო ტურიზმია. ომანის მოქალაქეებს არ სჭირდებათ ვიზა საქართველოში ჩამოსასვლელად. შესაბამისად, ქართველი ტურპერატორებისთვის ეს კარგი შესაძლებლობაა ტურისტების მოსაზიდად. თანამშრომლობის კიდევ ერთი სფერო ტრანსპორტია- ომანს კარგად დივერსიფიცირებული საზღვაო ურთიერთობები აქვს ინდოეთის ოკეანეში და ხმელთაშუა ზღვისპირეთში, რაც კიდევ ერთი პერსპექტიული მიმართულებაა, სადაც შესაძლებელია გამოყენებულ იქნას საქართველოს პორტების შესაძლებლობები," - განაცხადა კახა ბაინდურაშვილმა.
ესაა მეოთხე არაბული ქვეყანა, რომელსაც სავაჭრო-სამრეწველო პალატის პრეზიდენტი ეწვია 2012 წელს, მას შემდეგ, რაც გამართა შეხვედრები ლიბანში, არაბთა გაერთიანებულ საემიროებსა და კატარში. აღნიშნული ვიზიტებიდან საქართველოსთვის ლიბანი იყო ახალი ქვეყანა ეკონომიკური ურთიერთობის დამყარების კუთხით. კახა ბაინდურაშვილის თქმით, ლიბანში ვიზიტისას დამყარდა სამართლებრივი ურთიერთობები ლიბანის სავაჭრო-სამრეწველო პალატასთან. დაინიშნა საქართველოს სავაჭროპალატის წარმომადგენელი. ბეირუთში იმყოფებოდა პრემიერ-მინისტრი ნიკა გილაური.
