საქართველოში სპრედის მაჩვენებელი მსოფლიო ეკონომიკური ფორუმის და მსოფლიო ბანკის მონაცემებით 15%-ია. სპრედი, რომელიც სესხებზე და დეპოზიტებზე არსებულ საშუალო შეწონილ განაკვეთებს შორის სხვაობას წარმოადგენს, კონკურენციის ხარისხის შეფასების ერთ-ერთი მნიშვნელოვანი მაჩვენებელია.
"ახალგაზრდა ფინანსისტთა და ბიზნესმენთა ასოციაციაში" განმარტავენ, რომ ეროვნული ბანკის სტატისტიკით კი 10%-ის ფარგლებშია, ნებისმიერ შემთხვევაში ეს დიდი მაჩვენებელია და მსოფლიოში ამ მონაცემით ერთ-ერთ ბოლო ადგილზე ვართ. გლობალურ კონკურენტუნარიანობის ინდექსში საქართველო ამ მაჩვენებლით 142 ქვეყანას შორის 129-ე ადგილზეა. ეს იმაშიც აისახება, რომ ბანკებმა 2011 წელს სესხებიდან 1,2 მილიარდი ლარის შემოსავალი მიიღეს, ხოლო დეპოზიტების მომსახურება კი 391 მილიონი დაუჯდათ.
"როგორც რეგიონში, ისე მსოფლიოში საქართველოში ერთ-ერთი ყველაზე დიდია სხვაობა სესხის და დეპოზიტის საპროცენტო განაკვეთებს შორის. მსოფლიოში მხოლოდ რამდენიმე ქვეყანაშია სპრედი ჩვენზე მაღალი, ესენია: ტაჯიკეთი - 18%, პერუ - 17,4%, პარაგვაი - 24.8%, მალავი - 21%, მადაგასკარი - 38.8%, ყირგიზეთი - 27.4%, ჰაიტი - 16.2%, კონგო - 39.7% და ბრაზილია 31.1%", - აცხადებენ ასოციაციაში.
