საქართველოში ერთ-ერთი ყველაზე ძვირი კრედიტებია, ხოლო ქართული საბანკო სექტორი ეკონომიკის ხარჯზე იზრდება, - ამის შესახებ ნათქვამია "ახალგაზრდა ფინანსისტთა და ბიზნესმენთა ასოციაციის" კვლევაში. ასოციაციაში განმარტავენ, რომ დღეს საქართველოს საბანკო სექტორი 19 ბანკით არის წარმოდგენილი, რაც ისეთი პატარა ქვეყნისთვის, როგორიც საქართველოა, საკმაოდ დიდი რიცხვია. სექტორში კონკურენციის ხარისხი მაინც დაბალია. სწორედ ბანკების რაოდენობიდან გამომდინარე, საზოგადოების გარკვეული ნაწილი ამ სფეროში არსებულ მაღალ კონკურენციაზე საუბრობს. თუმცა მონაცემებში ჩაღრმავება რადიკალურად განსხვავებულ სურათს იძლევა.
"2011 წლის მე-3 კვარტლის ბოლოს, საქართველოს კომერციულ ბანკებში, ლარით დეპონირებული ყველა სახის დეპოზიტის საერთო მოცულობა 2,523 მილიარდ ლარს შეადგენდა, ხოლო უცხოურ ვალუტით დეპონირებულის - 4,505 მილიარდი ლარის ეკვივალენტს, ანუ, დეპოზიტების საერთო მოცულობა დაახლოებით 7,028 მილიარდი ლარი იყო. თუმცა 19 ლიცენზირებულ ბანკში, ლარით დეპონირებული მიმდინარე ანგარიშების ნაშთებიდან ორში, სს "საქართველოს ბანკში" და სს "ლიბერთი ბანკში", განთავსებული იყო საერთო მოცულობის ნახევარზე მეტი (57%), ხოლო პირველ სამეულში, სს "თიბისი ბანკის" ჩათვლით, საერთო მოცულობის 3/4-ზე მეტი (76%). ყველა ტიპის კონსოლიდირებული დეპოზიტებიდან (ბანკთაშორისის ჩათვლით) ლარით და უცხოური ვალუტით, 7,028 მილიარდი ლარის ეკვივალენტური საერთო მოცულობით, ნახევარზე მეტი, 59%, განთავსებული იყო ორ ბანკში (სს "საქართველოს ბანკი" და სს "თიბისი ბანკი"), ხოლო 71%, სამ ბანკში, სს "ლიბერთი ბანკის" ჩათვლით", - აცხადებენ ასოციაციაში.
"ახალგაზრდა ფინანსისტთა და ბიზნესმენთა ასოციაციაში" აცხადებენ, რომ გადაჭრით იმის თქმა, რომ საბანკო სექტორი მონოპოლიზებულია, არ შეიძლება. მაგრამ თუ მოვიშველიებთ სხვადასხვა მაჩვენებელს, ყველაფერი ნათელი ხდება.
