ქართული პროდუქციის პოპულარიზაციის და ადგილობრივი წამოების მხარდაჭერის მიზნით, საქართველოს სოფლის მეურნეობის სამინისტროს ორგანიზებით, ლატვიასა და ლიტვაში "ქართული ღვინის დღეები" გაიმართა. რიგასა და ვილნიუსში გამართულ ღონისძიებებს სოფლის მეურნეობის მინისტრის მოადგილე ია ჯანაშია ხელმძღვანელობდა. ახალი საექსპორტო ბაზრის მოძიებისა და ურთიერთთანამშრომლობის გაღრმავების მიზნით, მინისტრის მოადგილემ ბიზნეს სექტორის წარმომადგენლებთან შეხვედრები გამართა.
"ამ სახის ღონისძიებები საშუალებას მისცემს ქართულ კომპანიებს მსოფლიო ბაზარზე წარადგინონ საკუთარი პროდუქცია და მოიძიონ ახალი საექსპორტო ბაზარი. გამოფენისა და ბიზნეს შეხვედრების დასრულების შემდეგ, სადისტრიბუციო კომპანიებიდან კონკრეტულ წინადადებებს ველოდებით", - აღნიშნა ია ჯანაშიამ.
"ქართული ღვინის დღეებში" მონაწილეობას იღებდნენ ღვინისა და ალკოჰოლური, ასევე უალკოჰოლო სასმელების მწარმოებელი ადგილობრივი კომპანიები. კერძოდ: "შატო მუხრანი", "თელავის ღვინის მარანი", "მეღვინეობა ხარება", "კორპორაცია ქართული ღვინო", "თელიანი ველი", "ბესინი", "ქინძმარაულის მარანი", "სარაჯიშვილი", ქვევრის ღვინო, "ნატახტარი", "ქართული წყალი აქვა გეო" და სხვა. ქართულ დღეებზე მისულ დამთვალიერებელს სასმელებთან ერთად, ტრადიციული ქართული ყველის და ნუგბარის (ჩირი, ჩურჩხელა) დაგემოვნების საშუალება ჰქონდათ.
წარმოდგენილი ღვინისა და ალკოჰოლური სასმელების დეგუსტაციას ცნობილი სომელიეები და ექსპერტები ესწრებოდნენ. ღონისძიება "ქართული ხმების" სიმღერების თანხლებით მიმდინარეობდა.
სხვადასხვა ქვეყანაში გამართული "ქართული ღვინის დღეები" ხელს შეუწყობს ქართული პროდუქციის პოპულარიზაციას, საექსპორტო ბაზრის გაზრდას და საქართველოში ტურისტული სექტორის განვითარებას.
