მოსახლეობის საყოველთაო აღწერის ჩასატარებლად მთავრობამ სპეციალური კომისია შექმნა. როგორც "საქსტატში" განმარტავენ, საქართველოს მთავრობის 30 აპრილის #157 დადგენილების საფუძველზე მოსახლეობის აღწერის საკოორდინაციო სამთავრობო კომისია შეიქმნა. მოსახლეობის აღწერის საკოორდინაციო სამთავრობო კომისია შეიკრიბება უახლოეს მომავალში, სადაც დადგინდება მოსახლეობის საყოველთაო აღწერის ჩატარების ზუსტი თარიღი.
"საყოველთაო აღწერის თემა აქტურად განიხილება საზოგადოების სხვადასხვა წრეებში. კერძოდ, გამოითქვა ვარაუდი, რომ მოსახლეობის აღწერა ტარდება 2012 წელს. გვინდა აღვნიშნოთ, აღწერის მომზადებას და ჩატარებას მინიმუმ 1 წლიანი მოსამზადებელი პერიოდი სჭირდება, აქედან გამომდინარე 2012 წელს მოსახლეობისა საყოველთაო აღწერა ვერ ჩატარდება"- ნათქვამია "საქსტატის" მიერ გავრცელებულ პრესრელიზში.
როგორც ცნობილია, 2005 წლის ივლისში გაერთიანებული ერების ორგანიზაციის ეკონომიკურმა და სოციალურმა საბჭომ მიიღო რეზოლუცია, რომლითაც მან მოუწოდა წევრ სახელმწიფოებს განახორციელონ მოსახლეობის საყოველთაო აღწერები 2005-2014 წლების პერიოდში.
აღსანიშნავია, რომ "საქსტატი" უკვე დიდი ხანია სახელმწიფო ბიუჯეტისა და გაეროს მოსახლეობის ფონდის თანადაფინასებით ახორციელებს მოსახლეობის მომდევნო აღწერისათვის მზადებას. კერძოდ ამზადებს კითხვარებს, ინსტრუქციებს, ციფრულ კარტოგრაფულ მასალას შინამეურნეობების წინასწარი სიების შედგენისათვის და მზადყოფნას გამოთქვამს, აღწერის ჩატარების თარიღის დადგენის შემდეგ უზრუნველყოს შესაბამისი პროგრამის განხორციელება.
