პარლამენტის პირველი ვიცე-სპიკერ მიხეილ მაჭავარიანის შეფასებით, ესპანეთი საქართველოსთვის ძალიან მნიშვნელოვანი პარტნიორი ქვეყანაა.
ამის შესახებ მან ჟურნალისტებთან ესპანეთის სამეფოს დეპუტატთა კონგრესის საგარეო ურთიერთობათა კომიტეტის თავმჯდომარის ჯუზეპ ანტონი დურან ი ლეიდასთან შეხვედრის შემდეგ განაცხადა.
მაჭავარიანის შეფასებით, ესპანეთი საქართველოს ძალიან მნიშვნელოვანი პარტნიორი ქვეყანაა და მისგან ევროსაბჭოში ძალიან დიდი მხარდაჭერა არსებობს.
"ამასთან, ესპანეთის გავლენა ლათინოამერიკულ ქვეყნებზე ძალიან დიდია. ის ყველაფერს აკეთებს, რომ საქართველოს ოკუპირებული რეგიონების ცნობა არ მოხდეს. ესპანეთი მხარს უჭერს საქართველოს ტერიტორიულ მთლიანობასა და დღევანდელი მისი ვიზიტიც სწორედ ამ მხარდაჭერის დასტურია. ეს ქვეყანა ასევე აქტიურად უჭერს მხარს, რომ საქართველო საოკუპაციო ჯარებმა დატოვონ", - განაცხადა ვიცე-სპიკერმა და დასძინა, რომ საქართველოს პარლამენტი მეგობარი ქვეყნების დეპუტატებთან ინტენსიურ მუშაობას გააგრძელებს.
ესპანეთის სამეფოს დეპუტატთა კონგრესის საგარეო ურთიერთობათა კომიტეტის თავმჯდომარე ჯუზეპ ანტონი დურან ი ლეიდა საქართველოს დღეს ორდღიანი ოფიციალური ვიზიტით ეწვია.
