კორეელი ბიზნესმენები დაინტერესებული არიან საქართველოში ინვესტირებითა და სხვადასხვა პროექტების განხორციელებით, - განუცხადა საქართველოს სავაჭრო-სამრეწველო პალატის პრეზიდენტმა კახა ბაინდურაშვილმა ჟურნალისტებს სასტუმრო "ქორთიარდ მარიოტში" საქართველო-კორეის ბიზნესფორუმის დაწყებამდე.
"ამ ფორუმს წინ უძღვოდა საქართველოს მთავრობის წევრების რამდენიმე ვიზიტი კორეაში. მათ აინტერსებთ ის ბიზნესგარემო, რაც საქართველოშია და სწორედ ამან გამოწვია მათი დაინტერესება. თვითონ კორეული დელეგაციის შემადგენლობა საკმაოდ შთამბეჭდავია, რადგან მათ შემადგენლობაში არიან კომპანიები სამშენებლო და ენერგეტიკული სექტორებიდან, ასევე დელეგაციის შემადგენლობაშია სხვადასხვა საინვესტიციო ფონდები. ამ ეტაპზე საქართველოში რამდენიმე მსხვილი კორეული კომპანია უკვე მუშაობს, საუბარია "კეპკოზე", რომელიც საქართველოში რამდენიმე ენერგეტიკულ პროექტს ახორციელებს და კომპანია "ჰუნმდაიზე", რომელიც ქართულ ბაზარზე ერთ-ერთი წარმატებული კომოანიაა. მან წლების განმავლობაში საქართველოს ბაზარზე პროდუქციის დისტრიბუცია გაზარდა"- აღნიშნა საქართველოს სავაჭრო-სამრეწველო პალატის პრეზიდენტმა კახა ბაინდურაშვილმა.
აღსანიშნავია, რომ კორეის დელეგაციაში შემავალი ბიზნესმენები წარმოადგენდნენ კომპანიებს საინვესტიციო, საფინანსო, სამრეწველო, ნავთობისა და გაზის, ქიმიური მრეწველობის, ენერგეტიკის, ვაჭრობისა და ტელეკომუნიკაციების სფეროებიდან. მათი მიზანია საქართველოში ბიზნეს პარტნიორების მოძიება და საქმიანი ურთიერთანამშრომლობის დამყარება.
