სამხრეთ კორეას საქართველოში ძირითადად ენერგეტიკული პროექტები აინტერესებს, - ამის შესახებ ეკონომიკისა და მდგრადი განვითარების მინისტრმა ვერა ქობალიამ ჟურნალისტებს სასტუმრო "ქორთიარდ მარიოტში" საქართველო-კორეის ბიზნესფორუმის დაწყებამდე განუცხადა.
მინისტრის განმარტებით, ქართულ-კორეული ბინზესფორუმი, რომელსაც დღეს თბილისი მასპინძლობს, საქართველოსა და კორეას შორის ეკონომიკური ურთიერთობების გაღრმავების წინაპირობა გახდება.
"საქართველოსა და კორეის დიპლომატიური ურთიერთობები 20 წელს ითვლის, მაგრამ წელს არის პირველი წელი, როდესაც ასეთი ეკონომიკური ურთიერთობების დასაწყისს ვხედავთ. როგორც იცით, საქართველოს პრეზიდენტი იმყოფებოდა კორეაში, სადაც ძალიან კარგი შეხვედრა ჰქონდა კორეის პრეზიდენტთან. მათ განსაკუთრებით აინტერესებთ ენერგეტიკული სექტორი. მოგეხსენებათ, კორეა მსოფლიოში ცნობილია ენერგეტიკული პროექტებითა და გამოცდილებით,"- აღნიშნა ქობალიამ.
ფორუმს, რომელიც საქართველოსა და კორეის სავაჭრო-სამრეწველო პალატების ხელშეწყობით გაიმართა, ორივე მხრიდან 100-ზე მეტი კომპანიის წარმომადგენელი ესწრება.
აღსანიშნავია, რომ კორეის დელეგაციაში შემავალი ბიზნესმენები წარმოადგენდნენ კომპანიებს საინვესტიციო, საფინანსო, სამრეწველო, ნავთობისა და გაზის, ქიმიური მრეწველობის, ენერგეტიკის, ვაჭრობისა და ტელეკომუნიკაციების სფეროებიდან. მათი მიზანია საქართველოში ბიზნეს პარტნიორების მოძიება და საქმიანი ურთიერთანამშრომლობის დამყარება.
