ხვალ, 26 აპრილს, 10:30 საათზე, სასტუმრო "ქორთიარდ მარიოტში" საქართველო-კორეის ბიზნესფორუმი გაიმართება, რომელსაც ქვეყნის ეკონომიკური განვითარებისა და ფინანსთა მინისტრები დაესწრებიან.
საქართველოს სავაჭრო-სამრეწველო პალატაში განმარტავენ, რომ ფორუმში ასევე მონაწილეობას მიიღებენ საქართველოს და კორეის რესპუბლიკის სავაჭრო-სამრეწველო პალატების ხელმძღვანელები, ქართული და კორეული კომპანიების წარმომადგენლები. ბიზნესფორუმს 100-მდე კომპანიის წარმომადგენელი დაესწრება, როგორც ქართული ასევე კორეული მხარიდან.
კორეის დელეგაციაში შემავალი ბიზნესმენები წარმოადგენდნენ კომპანიებს საინვესტიციო, საფინანსო, სამრეწველო, ნავთობისა და გაზის, ქიმიური მრეწველობის, ენერგეტიკის, ვაჭრობისა და ტელეკომუნიკაციების სფეროებიდან. მათი მიზანია საქართველოში ბიზნეს პარტნიორების მოძიება და საქმიანი ურთიერთანამშრომლობის დამყარება. დღის მეორე ნახევარში ქართულ კომპანიებს შესაძლებლობა ექნებათ შესაბამისი სექტორების მიხედვით შეხვდნენ და მოლაპარაკებები გამართონ პოტენციურ ბიზნეს პარტნიორებთან.